Dagleg leiar i Herde Kompositt Kim Røssland og Cato Lyngøy i Ovum har no lagt egga sine i same korg, i og med at sistnemnde selskap overtar eigarskapet av Herde.

Ovum ny eigar av Herde Komposit

Rundt ni månader etter at Ovum AS inngjekk ein prinsippavtale om å overta Herde Kompositt, er overtakinga formelt gjort.

Håvard Sætrevik
Redaktør/Grenda
Publisert

Tysdag gjekk Herde Kompositt ut med nyhenda om at selskapet som driv fabrikken i Ølve blir del av Ovum AS.

– Herde Kompositt, som har produsert pilot-Egget® og no produserer egg nummer to, blir heretter sentral i Ovums satsing på flytande lukka teknologi. Ovum overtek alle aksjane i HAFS Holding, som igjen eig alle aksjane i Herde Kompositt, melder Ølve-bedrifta.

– Ovum og Herde Kompositt har jobba godt saman over tid, og no satsar vi for fullt saman. Herde Kompositt vil tilføre Ovum betydeleg konkurransekraft gjennom sin produksjonskompetanse, seier dagleg leiar i Ovum Cato Lyngøy i meldinga Herde la ut tysdag.

– Me er veldig glade for denne løysinga og gler oss til at samarbeidet blir meir formalisert, seier dagleg leiar Kim Røssland i Herde Kompositt.

Dei to selskapa ser lyst på framtida, spesielt etter at eit breitt fleirtal på Stortinget ho har bestilt ei miljøfleksibilitetsordning.

– Det er store forventningar til ordninga. Me står føre ein markert retningsendring i havbruksnæringa, der flytande lukka teknologi som Egget® vil gje eit avgjerande bidrag, kommenterer dei.

Det har ikkje lukkast å få ein kommentar frå Kim Røssland før Grenda gjekk i trykken.

nyhende økonomi industri
Powered by Labrador CMS