Overskot på 1,9 milliardar i fjor

Hydro Husnes har gjort opp rekneskapen både for fjerde kvartal 2023 og for heile året samla.

Onsdag presenterte Hydro Husnes eit overskot før renter, skatt og avskrivingar på 246 millionar kroner for fjerde kvartal 2023, og eit samla overskot på 1.878 millionar kroner for heile 2023. I 2022 var overskotet på heile 3,1 milliardar kroner, og i 2021 enda det på 1,2 mrd.

Hydro Husnes er leverandør av aluminium i fyrste rekkje til den europeiske bygge- og anleggsbransjen og bilindustrien. Det siste året har aktiviteten ved verket i Kvinnherad vore prega av inflasjon og rentehevingar i Europa.

– Nivået på økonomisk aktivitet i Europa har direkte innverknad på kor mykje aluminium som vert skipa ut ifrå Husnes, men vi ser no at marknaden har stabilisert seg etter ein periode med nedgang. Sjølv om volumet framleis er lågare, er prisane gode, ikkje minst takka vere den svake kronekursen, seier fabrikksjef Jon Ola Ystgaard i pressemeldinga.

Ny tappeverkstad

Arbeidet med oppgradering av elektrolyselinja i A-hallen på Husnes nærmar seg no ferdigstilling. Prosjektet har vorte gjennomført i ein periode med lågare produksjon, og er del av ei større investering i teknologioppgradering. Nyleg fatta Hydro òg avgjerd om investering i ny tappeverkstad til 87 millionar kroner, som vil gje framtidsretta og moderne infrastruktur til metalltransport internt på verket.

– Den nye tappeverkstaden med nye heilautomatiserte reinsemaskinar og klargjeringsstasjonar, vil gje eit stort løft for operatørane med omsyn til ergonomi og sikkerheit rundt arbeidsoperasjonane. Men ikkje minst vitnar investeringa om at Hydro har stor tru på framtidig berekraftig aluminiumproduksjon i Kvinnherad, seier Ystgaard.

Godt rusta

Men han understrekar at for å utvikla verket for framtida, er det òg heilt avgjerande med trygge rammevilkår for den kraftkrevjande industrien.

– Vi er vande med at industrien er syklisk, men takka vere systematisk og målretta arbeid med forbetringsprogram dei siste åra, er vi godt rusta i møte med krevjande tider. Men i ein meir ustabil marknadssituasjon treng vi føreseielege rammevilkår og tilgang på nok fornybar kraft. Regjeringa må få på plass ei robust CO2-kompensasjonsordning gjennom dialog med industrien. Her på Husnes har vi sett på nært hald at politikk verkar ved at B-hallen vart gjenopna etter at CO2-kompensasjonen kom på plass for verket. Med kompensasjon for CO2-prissmitten i kraftprisane får vi den trygginga vi treng for å utvikla verket, halda fram med verdiskapinga og trygga sysselsettinga, avsluttar Ystgaard.