Overrekte takksemd frå Guatemala

Nyleg reiste ein delegasjon frå venskapsgruppa i Kvinnherad på besøk til Guatemala. I kommunestyret torsdag orienterte Gaute Lund om turen.

– Vi trur vi kan læra av kvarandre, til nytte for alle, sa han, og slo fast at samarbeidet, som no har pågått i 25 år, skal halda fram.

Store protestar

Lund fortalde også litt om historia til landet med 17 millionar innbyggjarar. Det er ei mørk historie, prega av den spanske erobringa på 1500-talet og ikkje minst den 36 år lange borgarkrigen, som tok slutt i 1996. I desse krigsåra vart det utført det Lund karakteriserte som folkemord på maya-folket. No har heldigvis haldninga til mayaene snudd, og landet er stolt over kulturarven derifrå.

– I dag er det demokrati i Guatemala og ganske fredeleg, utruleg nok. Men veldig korrupt, sa Gaute Lund.

I august vart det arrangert presidentval. Då vann Bernardo Arévalo, som har varsla kamp mot den omfattande korrupsjonen i landet. Det såg lovande ut då sitjande president Alejandro Giammattei gratulerte med sigeren. Men etterpå har statsadvokaten og folk rundt han i typisk Trump-stil nekta å godkjenna valet. Det har ført til store protestar, spesielt i form av vegsperringar, noko også gjengen frå Kvinnherad fekk merka.

Brorskap

Men venskapsgruppa nådde til slutt fram til San Lucas Tolimán. Med seg heim hadde dei brev både til den førre ordføraren og til den nye. Una Kolle las opp teksten, som uttrykte glede over å fornya banda av brorskap og samarbeid, samt oppriktig takksemd til innbyggjarane i Norge for solidaritet og støtte.

Kolle overrekte også ein plakett som markerte 25-årsjubileet.

– Denne må vi finna ein flott plass til på rådhuset, takka ordførar Vegard Bjørnevik (H).

– Heile kommunestyret har fått ekstra kjennskap til vår venskapskommune etter denne framføringa. Eg vonar på eit flott og fruktbart samarbeid vidare, la han til.

Venskapsgruppa vil arrangera ope møte med fyldigare omtale av turen og situasjonen i landet den 22. januar i biblioteket.