Overraska prisvinnar

Ragnar Nøttveit frå Ænes ante fred og ingen fare då han reiste til Stord på søndag. Nokre timar seinare var han tildelt Frivilligprisen 2017 frå Sunnhordland prosti.

På søndag vart den årlege nyårsmottakinga i Sunnhordland prosti arrangert i Nysæter kyrkje på Stord. Dette er ei samling for representantar frå næringsliv og det offentlege i prosti-området, saman med kyrkjeleg tilsette og rådsleiarar frå dei ulike kommunane. På programmet stod mellom anna song ved Rosendal Songlag og utdeling av prostiet sin frivilligpris for 2017.

 

Trufast og kreativ

Prisen vart oppretta av prostirådet for å stimulera til frivillig innsats og retta merksemda mot spesielt aktive frivillige medarbeidarar. Kriterium for tildelinga er trufast teneste og/eller kreativ nyskaping. Ragnar Nøttveit fekk karakteristikken «omfattande, trufast og kreativ teneste».

I grunngjevinga er følgjande moment trekt fram: Leiar og medlem i Ænes sokneråd i mange periodar, medlem i Kvinnherad kyrkjelege fellesråd i mange periodar, initiativtakar og redaktør for boka «Gamle bilete frå Ænes sokn», medlem i jubileumsnemnda og medarbeidar for boka «Ænes kyrkje 750 år», har etablert museum i tårnloftet i Ænes kyrkje og er omvisar i kyrkje.

Forslagsstillar var Ænes sokneråd. I tillegg til velfortent heider, fekk prisvinnaren eit diplom laga av Per Flatøy. Utdelinga vart gjort av prost Svein Arne Theodorsen og ordførar Peder Sjo Slettebø.

 

Drillo

Ragnar Nøttveit hadde fått med seg at fotballtrenar Egil «Drillo» Olsen vart tildelt heidersprisen på Idrettsgallaen kvelden før, og tykte det i alle fall var eitt likskapstrekk.

– Eg skal ikkje samanlikna meg med Drillo, men i begge tilfella visste alle andre kva som skulle skje utanom oss. Det kom såleis litt brått på, ler Nøttveit.

– Men det er vel kjekt med heideren likevel?

– Jau, det er det, men eg synest kanskje det vart i meste laget, seier prisvinnaren, som òg tykkjer forgjengaren som soknerådsleiar, Karsten Bjørke, hadde vore ein pris verdt.

Nøttveit er opphavleg frå Askøy og har såleis ikkje budd på Ænes heile livet. Arbeidet han har gjort for Ænes kyrkje og sokn må uansett reknast som eit livsverk.

– Då eg vart spurd om eg kunne verta kyrkjetenar, sa eg ja fram til dei fann nokon andre, og det vart ganske lenge. Men då eg nærma meg 80 meldte eg frå at eg ville gje meg både som kyrkjetenar og soknerådsleiar, fortel Nøttveit, som fyller 82 år til våren.