Overraska med milliongåver: – Det varmar så utruleg mykje

Ikkje mindre enn 2.750.000 kroner skifta hender då Sparebank 1-stiftinga heldt ei lita mini-gåveutdeling i Kvinnherad Næringsservice sine lokalar måndag kveld.

– Det er stiftinga si oppgåve å støtta heile samfunnet, frå barnehagebarn til dei eldste. Stiftinga skal ikkje støtta kommunale oppgåver, men vi ser at den ålmennytta som kjem sluttbrukarane til gode hos Ungdomsbasen og Fjellhaugen Skisenter er viktig, sa styreleiar Svein Arne Eidsvik i Sparebank 1-stiftinga Kvinnherad før gåveutdelinga starta.

Overvelda

Ei gåveutdeling som tvinga fram dei alle fleste kjenslene hos gåvemottakarane.

– Eg er heilt overvelda. Eg hadde på ingen måte trudd at vi kom til å få full pott. Det varmar så utruleg mykje, sa avdelingsleiar Vigdis Gammelsæther i tiltak og ressurs i Kvinnherad kommune.

Ho og Arve Rødland fekk begge bakoversveis då dagleg leiar i stiftinga, Bente Lie Nilsen, kunne fortelja at Ungdomsbasen i Kvinnherad var tildelt ei gåve på 1.000.000 kroner til ei rekkje tiltak. Blant anna til eit auka fokus på mat, arbeid med antirasisme, gamingutstyr, to nye biljardbord, badekar til Villatoppen og midlar til møblar og utstyr i samband med den store oppussinga av Ungdomsbasen på Husnes.

– Vi har jobba veldig mykje med å få til gode miljøterapeutiske situasjonar for ungdomane, og ser at mat er veldig sentralt. På Husnes etablerer vi no eit stort kjøken, der vi får moglegheita til å dra mat meir inn i arbeidet. Det å få det på plass og faktisk ha midlar til å satsa på det er heilt avgjerande, og no får vi det. Heilt fantastisk, sa Gammelsæther.

Rørt

Leiar i Husnes Utvikling, Ellinor Rein, vart også sett ut då styremedlem Magnhild Haugland og nestleiar Jan Magnus Aasen offentleggjorde gåva til laget sitt prosjekt med å etablera ein familiepark på Husnes.

– Regionssenteret Husnes har mykje godt. Gode idrettsanlegg, camping, båtplass og ein levande handel, men ein familiepark, det manglar dei, sa Aasen før Haugland la til:

– Stiftinga er difor veldig imponerte over det arbeidet de har sett i gang. Vi gler oss over det, og synest det er kjekt å kunna bidra. De er difor tildelt ei gåve på 1.000.000 kroner, sa ho og overrekte diplomet til ei tydeleg rørt Ellinor Rein.

– Eg vart teken heilt på senga her no. Tusen, tusen takk. Eg må rett og slett samla meg litt, sa Rein.

Familieparken på Husnes er delt opp i to byggjetrinn, eit på land og eit på vatn. Takka vera gåva frå stiftinga kan byggjesteg éin no setjast i gang.

– Plutseleg var familieparken finansiert. Dette betyr at vi kan setja spaden i jorda, stadfesta Rein.

Kan senka skuldrane

Men sjølv om måndagens utdeling var kategorisert som ei mini-utdeling, eller ei oppvarming til den store utdelinga 2. mai, så var dei ikkje ferdige der.

– Det som skjer i Fjellhaugen er noko som kjem alle barn og unge i Kvinnherad til gode. Difor er det ekstra stas å kunna støtta Fjellhaugen Skisenter med 600.000 til eit nytt styringssystem, sa styremedlem Hildegunn Eiane Aarthun før Gunnar Våge la til:

– Men vi har også merka oss at de har arrangert skidag til alle elevane i kommunen. Eit flott prosjekt, der de gjer meir enn ein kan venta av dykk. Difor vil vi bidra med 150.000 kroner til utgiftene de har hatt med skidagane, sa Våge.

Til stor glede for dagleg leiar Kent Are Kjørsvik Petterson i Fjellhaugen Skisenter.

– Dette gjer alt arbeidet verdt det. Det varmar skikkeleg, og det er ei gåve eg trur heile driftsgjengen kjem til å setja stor pris på, sa Petterson og la til:

– Vi har i dag eit styringssystem frå 1973 som det er umogleg å få reservedelar til. Slik det er i dag, så ryk ein heil sesong hos oss om ein komponent i styringssystemet blir øydelagt. Med desse midlane så er vi eit kjempestort steg nærare å få på plass nytt styringssystem. Når vi får det så kan vi senka skuldrane i mange år framover. Då vil heile anlegget vårt vera up to date heilt fram til 2037.