Overraska kommunen med gåve på sin eigen dag

Kvinnherad kommune fekk tysdag 14 berekraftige utemøblar i gåve frå Hydro og møbelprodusenten Vestre AS.

– Kva har Husnes i dag til felles med Times Square i New York? Jo, svaret er at dei begge har verdas mest berekraftige utemøblar, sa konsernsjef Hilde Merete Aasheim i Hydro.

Flott utsikt

I samarbeid med møbelprodusenten Vestre AS har Hydro gitt heile Husnesparken eit ansiktsløft i form av at dei har plassert ut 14 nye, berekraftige utemøblar rundt om i parken.

– Det har vore eit lite mysterium med desse utemøblane som har dukka opp. Men utsikten her i frå gjer eit aldri så lite hint, sa fabrikksjef Johan Berg og peika bort til aluminiumsverket.

Då hadde heile følget som tysdag føremiddag var på fabrikkbesøk på Hydro Husnes teke turen bort i Husnesparken.

– Når vi feirar er det også på sin plass med ei gåve. Eg håpar at desse 14 utemøblane kan skapa hygge og kos med god utsikt til verket, sa Aasheim.

Verdas grønaste aluminium

Møblane er laga av berekraftig aluminium produsert av Hydro, og er designa og produsert av møbelprodusenten Vestre AS.

– Benkane er laga av verdas grønaste aluminium og kjem med livstidsgaranti. Desse kan de kasta ut på vatnet her og ta dei opp etter 20 år, og dei vil vera like fine. Men ikkje gjer det, sa administrerande direktør Jan Christian Vestre.

– For ei fantastisk flott gåve som no er stilt ut i den flottaste parken i Kvinnherad. Og med den utsikta til både fjell og Hydro Husnes. Tusen takk, sa ordførar Hans Inge Myrvold.