Over 50 har meldt interesse for eigen skogbruksplan

For eitt år sidan tok skogeigar Ragnvald Vaage (t.v.), Gro Kampp Hansen frå Statsforvaltaren i Vestland, skogbruksansvarleg i Kvinnherad Francesca Galdiolo og skogeigar Trond Holmedal til orde for brei oppslutnad om skogbruksplan for Kvinnherad.

Bakgrunnen for at kvartetten stod fram i mellom anna Grenda var å gjera skogeigarar merksame på at statsforvaltaren ville ta 70 prosent av rekninga om ein tinga taksering av skogen sin i denne runden. No er det på tide å ta neste steg.

Informasjonsmøte

– Ein har fått så stor påmelding at ein har runda eit hjørne på vidare i prosessen med planane, fortel Trond Holmedal til Grenda.

I februar 2022 opplyste kvartetten at det i Kvinnherad er det rundt 150 kvadratkilometer drivverdig skog, og at dette er skog som ikkje har vore taksert på 25 år.

– Planane er frå 1998, er utgåtte på dato og må fornyast, seier Trond Holmedal fornyinga av skogbruksplanane og MIS-registreringa som no blir førebudd i Etne og Kvinnherad.

Det blir informasjonsmøte i Etne 1. mars, medan møtet for Kvinnherad blir halde i Folgefonnsenteret 2. mars.

– Alle som har meldt interesse for plan må stadfesta med påmelding no. Det er sendt ut tilbod til alle som har 50 dekar skog eller meir, men skogeigedomar med mindre areal kan også få utarbeida planar på same vilkår, for dei som vil, opplyser Holmedal vidare.

Statsforvaltaren i Vestland dekker 70 prosent av kostnaden til dei som bestiller plan no, men eit slikt tilskot blir ikkje gitt ved enkeltbestillingar seinare. Påmelding kan no gjerast på AT-Skog si nettside, med frist 15. mars i år. Planane blir produserte i papirutgåve og digital utgåve, og skal vera ferdige i 2024.

Sertifisert

Førebels har over 50 skogeigarar teikna seg for å få plan utarbeidd.

– Jo fleire ein får med, jo meir effektivt blir det for dei som skal laga planane, og med det blir det rimelegare for den einskilde skogeigaren, argumenterer Holmedal.

Dei som treng meir informasjon vert oppmoda om å kontakta skogeigarane Ragnvald Vaage eller Trond Holmedal, Francesca Galdiolo i Kvinnherad Kommune eller Kjetil Vinje i AT-Skog.

– Ein må ha skogbruksplanar og miljøregistrering av skogen for å få kjøparar av tømmer. Kjøparar både i Norge og Europa krev at trea er hogge på ein miljømessig god måte. Ein må ha registrering av miljøverdiane i ein slik plan, slik at ein tar omsyn til miljøverdiane når ein steller og høgg skogen, forklarte Holmedal i 2022, og la til at utan ein slik plan, er skogen tett på verdilaus.

– Dette handlar også ein del om å vera miljøsertifisert, og med det tilsvarande miljøbevisst og berekraftig i skogdrifta si, sluttar Holmedal