Over 150 på HV-øving

Øvinga starta med førebuingar torsdag og fredag, og så føregjekk hovudøvinga frå laurdag morgon til måndag. Heile 154 soldatar var kalla inn. Dei fleste tilhøyrde Indre Hardanger og Kvinnherad Heimevernsområde, det vil seia kommunane Kvinnherad, Ullensvang, Etne og Eidfjord. Denne gjengen har ansvaret for å forsvara eit distrikt som strekkjer seg frå Dyranut på Hardangervidda til Ulevåsletta på Haukeli, og vidare ned til Ølen.

– Vi hadde grunnutdanninga på Bjørnebølsfossen, Fjellhaugen, Midthølen og inn til Grøningen. Og så hadde vi øving på Husnes, Vik i Matre og Indra Matre. Vi hadde òg folk inn mot Odda, fortel områdesjef Tor Vidar Sæle.

HV-09, som Indre Hardanger og Kvinnherad Heimevernsområde høyrer til, hadde på førehand sett opp nokre øvingsmål.

– Det var ei veldig bra øving. Vi nådde alle måla og fekk gjennomført den opplæringa vi skulle. I tillegg var vi svært heldige med vêret. Sjølvsagt toler vi å øva i regn, men alt blir mykje enklare når det er opplett, seier Sæle.

– Kan du seia noko meir om kva de trena på?

– Enkeltmannsferdigheiter, lagsferdigheiter, troppsferdigheiter og områdeferdigheiter.

Sjef i 17 år

Sidan førre øving har Indre Hardanger og Kvinnherad Heimevernsområde blitt utvida med ein tropp, som hovudsakeleg består av folk frå Bergen. Dei var med for fyrste gong.

– Det var veldig positivt. For å ordna med transporten hadde vi også med oss 28 bilar frå Bergen, fortel Tor Vidar Sæle.

Ordførar Vegard Bjørnevik hadde sett av store deler av laurdagen for å vera til stades på øvinga. Han fekk då snakka med både befal og menige soldatar.

– Veldig kjekt at han besøkte oss. Det vart sett stor pris, og viser at kommunen er opptekne av Heimevernet og det vi jobbar med, rosar Sæle.

Områdesjefen er utdanna kaptein i Forsvaret. Han har no hatt sjefsjobben i det lokale Heimevernet i 17 år.

– Eg får satsa på å passera 20 år, og så kanskje finna på noko anna, humrar han.

Han reknar med det blir ny øving allereie neste år.

– Utgangspunktet er at vi skal ha øving kvart år. Det blir nok ikkje mindre slik situasjonen er rundt oss for tida, vil eg tru, vurderer Tor Vidar Sæle.