Opsangervegen: Vassbakk & Stol billegast

Med ein tilbodspris på 52.768.101,80 var det store Karmøy-firmaet Vassbakk & Stol det billegaste av tilbydarane til opprustinga av Opsangervegen.

Dei to lokale firmaa Byggservice og Dimmelsvik Entreprenør var blant bedriftene som leverte inn pris på jobben med ny Opsangerveg og oppgradering av vass- og avløpsnettet i same område. I tillegg fekk Kvinnherad kommune inn prisar frå Rogalandsfirmaet Risa og det Bergensbaserte Anleggsgartner Svein Boasson.

– Det var veldig låg margin mellom dei to lågaste. Det skilde berre 1,7 prosent opp til Dimmelsvik Entreprenør på andreplass, fortel Per Inge Naterstad, som er kommunen sin prosjektleiar for Opsangervegen.

Stor jobb

– Me har sjekka at alt er prisa, at dokumentasjonen er på plass og at tilbydarane er kvalifiserte for oppdraget. No startar prosessen fram mot kontraktskriving. Først er det ein ti dagars klagefrist på tildelinga av kontrakten til Vassbakk & Stol. Når den er ute, er me klare til å inngå kontrakten. I tillegg får formannskapet saka opp som ei orienteringssak på møtet 9. februar, forklarer Naterstad.

Sluttdatoen for utbetringa er i anbodet sett til 30. juni 2018. Før det er det ein relativt stor jobb som skal gjerast.

– Det er ikkje nokon komplisert jobb, men det er mykje som skal gjerast. Det er i Husnes sentrum, og ein skal både oppgradera vegen og leidningsnettet for vatn og avløp. Dette skal ein gjera samstundes som ein skal halda trafikken open og forsyna oppsitjarane i området med vatn, påpeikar Naterstad.

Han rapporterer om jamt prisnivå på dei innleverte tilboda. I tillegg til liten differanse mellom dei to lågaste prisane, var det også tett mellom nummer 3,4 og 5.

– Når det er slik, så har me fått rett pris, vurderer prosjektleiaren.