Oppsving for nyinnflyttaren
Det er no snart fire månader sidan Sport Outlet flytta inn i varmen på Storsenteret. - Me ligg godt over fjoråret, seier dagleg leiar Kristina Saghaug.
Den daglege leiaren er strålande nøgd med både våren og sommaren så langt.
– Det har gått veldig fint. Dei fyrste par månadane kan ein nesten ikkje telja med, men sommaren har vore bra. Tala har gått opp, og me ligg godt over fjoråret så langt, fortel Saghaug.
Annonse
«Dropp-inn»
Men flyttinga har ikkje berre gått positivt utover tala, også kvardagen har blitt lettare for dei tilsette i det nye lokalet.
– Logistikken er blitt lettare, det er blitt enklare å utføra enkelte arbeidsoppgåver og ikkje minst færre løft. No kan me trilla pallane fram til der dei skal vera og jobba med dei der. I det gamle lokalet var det eit puslespel utan like, forklarer den daglege leiaren.
Saghaug merkar at også kundane er nøgde med flyttinga, i tillegg til at ho no ser fleire av ein viss type kunde.
Annonse
– Eg ser at me har fått fleire «dropp-inn»-kundar. Me låg jo litt i bakevja der nede, og no i sommar har det gjerne vore innom fleire turistar som før ikkje visste at me var her. Kundane seier også at det er kjekkare med betre plass. Dei ser lettare kor ting er og får betre oversikt. Me er veldig nøgde med flyttinga, og angrar ikkje på det, understrekar ho.
Større trøkk
Sjølv om sommaren har vore god for den nyinnflytta butikken, kan den daglege leiaren også fortelje om hektiske dagar for dei tilsette.
– Me har berre to tilsette i 100 prosent stilling, resten har mindre stillingar, så det har vore litt hektisk i ferieavviklinga og litt større trøkk på dei som har vore igjen. Men me har flinke ungdommar som har gjort ein god jobb, poengterer Saghaug.
Dersom dei travle dagane fortset vidare utover hausten og vinteren ser Saghaug derimot for seg at dei moglegvis må tilsetja fleire folk.
– Det er ofte hausten og vinteren det er størst pågang her hjå oss, så då blir det kanskje behov for fleire, men dette må me ta på sikt, avsluttar ho.
