Opposisjonen samlar seg om valteknisk samarbeid

Semja om samarbeidet vart meisla ferdig under Kvinnheradkonferansen onsdag.

– Me raskt etter at valresultata var klare, og etter at det var tydeleg at det danna seg ein koalisjon me ikkje var del av, så tok me kontakt med kvarandre for å undersøka om det var interesse for å inngå eit valteknisk samarbeid for å sikra oss posisjonar, fortel Silje Nordtveit Olsen (SV), Veronica T. Thorsen (Sp) og Tove Lill Lakselv (Frp) til Grenda.

Finflikking

Sp skal ha fem mandat i det nye kommunestyret, Frp og SV skal begge ha tre. MDG, som får eitt mandat, blir også med i samarbeidet. INP vel å stå utanfor dette samarbeidet, men med fem mandat er dei uansett store nok til å få plass i formannskapet, og alle utval med sju medlemmer.

Partia gjer dette for å sikra seg posisjonane, då dei kunne risikert å bli skvisa ut av både formannskap og utval utan eit slik samarbeid.

– Me i saman kunne enda opp med mista ein plass i formannskapet, som ville kome posisjonen til gode i staden, utdjupar Nordtveit Olsen når ho argumenterer for samarbeidet.

Dei tre partia Grenda snakkar med uttalar ein stor vilje til å respektera kvarandre sine parti i forhandlingane, slik at dei ulike partia får sjansen til å fremja sine saker i dei utvala som dei ynskjer å vera med i.

– INP har vore inviterte med inn, og me har hatt gode samtalar med dei, men dei ynskjer å stå på ei liste for seg sjølv. Me har litt finflikking igjen å diskutera, og reknar med å ha namn å presentera i slutten av denne veka. Formannskapet er ein prioritet for dei fleste av oss, seier trioen.

– Heile gjengen er klare for å driva tydeleg opposisjonsarbeid, sluttar Thoresen.