Opposisjonen får kontroll

I dei to føregåande kommunestyreperiodane har posisjonen også hatt fleirtalet i kontrollkomiteen. Dei neste fire åra kjem opposisjonen til å få det.

– Me var dei som laga mest baluba over at posisjonen valte å ha både fleirtalet og leiaren i kontrollkomiteen. Då ville det vore dobbelmoralsk av oss å ikkje følgja opp no og gje opposisjonen dette i dei komande fire åra, seier Peder Sjo Slettebø til Grenda.

Han ser heller ikkje noko problem med å gje dette til opposisjonen.

– Ein må ha tillit til at dei demokratiske prosessane blir skikkeleg gjort. Og politisk er det ei rettesnor som gjer at me må syta for å halda vår sti rein og bein, legg han til.

I tillegg til å ta tak i eventuelle politiske saker, skal kontrollutvalet mellom anna sjå til at kommunen sin rekneskap vert revidert på ein trygg måte og sjå til at det vert ført kontroll med forvaltning av kommunen sine interesser i selskap.