Hugs å melda frå om uhellet skulle vera ute

Hjorteviltregisteret har registrert 17 påkøyrde dyr i Kvinnherad så langt i år. Kor mange som ikkje er meldt inn veit ein ikkje.

Ifølge Statens vegvesen er det ikkje straffbart å køyre på eit dyr, men straffbart å ikkje melda ifrå om det. Kvinnherad ettersøkslag ser tendensar til at fleire unnlèt å melda ifrå.

– Det er mange som har kome bak ein påkøyrsle som meldar ifrå, eller nokon som finn ein daud hjort i ettertid som ringer inn. Det er nesten umogleg å vita kor mange som ikkje melder inn ein påkøyrsle, fortel leiar i Kvinnherad ettersøkslag Kjell-Rune Gausvik.

Meldte ikkje ifrå

Måndag kveld observerte ein forbipasserande på Røyrane i Hatlestrand ein skadd hjort langs vegen.

– Kalven vart funnen og avliva etter nokre timar. Ettersøkslaget merka at dyret tydeleg hadde vore påkøyrd og spor i vegbana i nærleiken stadfesta dette. Korkje ettersøkslag eller politi hadde fått melding om dette, fortel rådgjevar for skogbruk, utmark og viltforvalting i Kvinnherad kommune Francesca Galdiolo.

– Dette er ein trist og alvorleg hending, og dette har blitt eit «vanleg» problem som ser ut til å vera aukande i omfang, legg ho til.

Til no i år har hjorteviltregisteret registrert 21 såkalla «fallvilt» i Kvinnherad. Dette er dyr som ettersøkslaget har vore ute og registrert. 17 av desse er registrert som påkøyrde.

– Det kan jo henda at det er fleire som er påkøyrde, men at dei har døydd i ettertid. Enkelte tenker kanskje at «det visar jo ikkje skade på bilen og hjorten sprang jo av gårde, så det går greitt», men det skal meldast ifrå uansett, fortel Gausvik.

Ettersøkslaget skal ut og sjekka kvar gong dei får melding om påkøyrsle eller daude dyr.

– Om hjorten spring av gårde kan det likevel henda at den har fått seg ein smell og fått ein del adrenalin som gjer at den spring. Likevel kan den ha indre skadar som ikkje er synlege, fortel Gausvik og legg til;

– Det er ikkje kjekt om det er eit dyr som ligg og lir. Hjorten som vart funnen måndag var klart trafikkskadd, og ein kunne tydeleg sjå at dyr kan ha store lidingar sjølv om dei spring vidare.

Ver oppmerksam

Gausvik fortel at det ofte er travlast om hausten og vinteren når det er lenge mørkt, men at folk likevel kan vera oppmerksame i utsette områder.

– No har det vore ein periode der vi har måtta ut ein del gonger. Det er lite mat lenger oppe i skogane og samstundes har det grønskast nede i områda, og då kryssar gjerne hjorten vegen sjølv om det er lyst ute, seier han.

Ettersøkslaget og Kvinnherad kommune oppmodar folk om å køyra forsiktig og melda ifrå om uhellet skulle vera ute.

– Det er ikkje straffbart å køyra på eit dyr, men straffbart å ikkje melda ifrå. Det ser ut til at mange bilistar ikkje har fått med seg dette, minner Galdiolo om.

Ved uhell kan ein ringe politiet som tek kontakt med viltnemda. Statens vegvesen har gode råd til deg om uhellet skulle vere ute. Mellom anna kan det vera greit å hugsa på at du:

– Aldri skal følgja etter eit skadd dyr sjølv. Det kan både vera farlig og det gjer ettersøkslaget sitt arbeid vanskelegare.

– Skal sikra skadestadet ved å setja ut varseltrekant og skru på naudblink på køyretøyet.

– Skal ta på deg refleksvest.

Les meir om pliktar ved påkøyrsle her.