Opplever ei trenering frå kommunen si side
FAU Valen skule sendte i mars i år spørsmål til Kvinnherad kommune om den vedtekne samlokaliseringa og samanslåinga av skulane Valen og Skarveland. I brevet spør dei om status på prosjektet.
Publisert
Sist oppdatert
«I vedtaka frå formannskap og kommunestyre i 2022 ligg det føre at det skal byggjast ny skule som skal husa begge krinsane, og at ny skule skal vera klar til skuleåret 2027/2028. No er det gått to år sidan vedtaket, og FAU Valen skule ynskjer meir informasjon om kor langt denne prosessen er komen», heiter det i brevet.
Dei visar til at det sidan vedtaket om samlokalisering frå 2022 har kome fleire elevar frå andre krinsar som har flytta til Valen skule og at dette syner eit gjeldande behov for ny skule.
Annonse
Svar frå kommunen
FAU Valen skule ville ha svar på følgjande spørsmål;
1.Kva er status for nybygget Valen og Skarveland Skule?
2.Kor er planen at denne nye skulen skal liggje?
Annonse
3.Kva er planen for finansieringa av denne skulen? Føreligg det eit budsjett?
4.Er det framleis planen at denne skal takst i bruk skuleåret 2027/28?
5.Korleis vil Kvinnherad kommune ivareta elevane på dagens Valen og Skarveland skule fram til og under byggjeprosessen?
12.april kom svaret frå kommunen.
«Ny skule for Valen – Skarveland ligg som tiltak i kommunen sin økonomiplan 2024-2028, med kr. 150 mill. I økonomiplanen som vart vedteken i desember 2023 vart tiltaket skyvd på i tid, og ligg no inne i 2028. Dette vil få konsekvensar for punkt to i vedtaket, som seier at ny skule skal stå ferdig seinast 27/28», skriv ordførar Vegard Bjørnevik og konstituert kommunedirektør Gunn Berit Sandnes Fosse i svarbrevet.
«Ut frå dette vil ordførar be om å få ei oppdatert orientering til kommunestyret frå Sektor Oppvekst. Saka må ta for seg status, vurderingar og vektingar knytt til spørsmåla de stiller i dette brevet og kva som skal liggja til grunn for vidare framdrift i saka», avsluttar dei.
Annonse
Ikkje godt nok
Etter svarbrevet frå kommunen samla FAU Valen og FAU Skarveland seg til felles møtet der dei drøfta saka og svara dei hadde fått.
«Vi deler opplevinga av at svaret vi har fått i svært liten grad svarar på spørsmåla vi har stilt, anna enn at tiltaket er forseinka til 2028. Vi opplev i det heile at kommunen i liten grad tek vedtaket seriøst», skriv dei i eit nytt brev til kommunen.
«Sidan 2022 har det blitt gjort tilnærma ingenting for å vidareføra arbeidet med vedtaket, samstundes som det i liten grad har blitt teke tak i konsekvensane ved vedtaket. Talet elevar som søkjer seg til Valen skule frå Utåker og Skarveland krins har auka merkbart sidan 2022, mellom anna fordi det er ynskje om at elevane skal sleppe skulebyte undervegs og at dei skal få følgje kameratane frå barnehagen. Dette har naturleg nok gått ut over elevtalet på Skarveland skule, og skapar utfordringar med tanke på sosialt miljø, rekruttering av personale og deling av vennegjengar der berre nokre av elevane får byte skule», skriv dei.
No ber dei om ei tydeleg konsekvensutgreiing for korleis dette vedtaket påverkar skulane og kva som skjer om tendensen til å søkja byting av skule held fram.
«Om nokre år er vi nede i 10-15 elevar på Skarveland. Er dette eit godt miljø for elevane? Kor skal smertegrensa gå for ei samanslåing for å trygge både elevane og dei tilsette sitt pedagogiske og psykososiale skulemiljø? Og når grensa er nådd – er Valen skule klar til å ta imot alle elevane? Blir elevane sine rettar tatt omsyn til? Dette må kartleggast og svarast på før konsekvensane blir større – dette er ikkje eit hypotetisk scenario men ein hard realitet som kjem nærare og nærare», skriv FAU Valen og FAU Skarveland.
Annonse
FAUane reagerer også på at det ikkje er gjort noko synleg arbeid for å koma vidare i saka om ny eller renovert skule.
«Vi opplev ei trenering frå kommunen si side og mange spørsmål står framleis utan svar. Skal det byggast ny skule? Kor? Kva tid er den ferdig? Og kanskje det viktigaste spørsmålet; Kva skjer med elevane på Valen og Skarveland fram til denne byggjeprosessen startar og under prosessen fram til skulen står klar?».
Tal frå Statistisk sentralbyrå syner at ein vil ha store kull i skuleåret 28/29. FAUane meiner det er kritisk at skulen er på plass til då.
«Er det slik at ein håpar på at om ein sit stille i båten lengje nok så blir det gløymt, som med vegutbetringane i same del av kommunen? Det kan me ikkje godta! No må kommunen ta ansvar og følgje opp det lovfesta vedtaket dei sjølv har gjort», avsluttar dei.
