Oppkjøpet av Kvinnherad Elektro er fullført

I ei børsmelding opplyser Eqva ASA at dei no er i mål med oppkjøpet av Kvinnherad Elektro AS og majoriteten av Vassnes Solutions AS.

Det var onsdag morgon børsmeldinga med stadfestinga vart sendt ut. Der skriv Eqva at avtalen med Kvinnherad Elektro som vart annonsert 14. mai i år, no er sluttført. Avtalen inkluderer Kvinnherad Elektro sin 51% store eigardel i Vassnes Solutions.

«Etter denne transaksjonen vil Nordic Industrial Solutions (NIS), den nyleg etablerte industrigruppa som er eigd av Eqva, bli eineeigar av BKS-gruppa og Kvinnherad Elektro-gruppa. NIS vil bli ei plattform for vidare vekst og verdiskaping med Eqva som sin hovudeigar», står det i meldinga.

Omstrukturering

Eqva skriv at oppkjøpet har stor strategisk verdi, og styrkar konsernet sin posisjon som ein leiande leverandør til den komande, omfattande oppgraderinga og omstruktureringa av norsk industri. NIS vil no ha fleire enn 550 tilsette. Av desse jobbar 270 innan kraft og automasjon.

– Gjennom etableringa av NIS og oppkjøpet av Kvinnherad Elektro og Vassnes-gruppa, fortset Eqva med å levera på sin strategi for vekst og å utvida sitt servicetilbod. Denne kombinasjonen styrkar NIS sin tilgang til attraktive marknadar i Vest-Norge, slik som smelteverksindustrien, maritim industri og offshoreindustrien. Vi ser fram til å samarbeida med våre nye kollegaer i både Ølen og Rosendal, og vil streva for å ytterlegare auka servicetilbodet til våre verdsette kundar, seier Even Matre Ellingsen, adm. direktør i Eqva, i børsmeldinga.

Styrka kompetansen

Både Kvinnherad Elektro og Vassnes Solutions skal halda fram med sine gamle namn og leiing.

– Vi er glade for å bli ein del av Eqva. Vi har ein historie med tett samarbeid med Eqva sitt dotterselskap BKS, og vi opererer i den same regionen og dei same marknadane. Denne samanslåinga gjev oss moglegheita til å auka vår marknadsandel og styrka kompetansen og kvaliteten på tenestene våre, til både eksisterande og nye kundar. Vi ser også potensiale til å ta på oss større fleirfags prosjekt i framtida, kommenterer Kjetil Helvik, dagleg leiar i Kvinnherad Elektro.

Kvinnherad Elektro har eksistert i over 80 år, og har no 42 tilsette. Vassnes-gruppa har 160 tilsette.