Oppdatering frå kommunen
Tidlegare i dag publiserte Grenda ei sak om Prestabryggja i Rosendal, der vi skreiv at vi ikkje hadde fått tak i kommunen. No har dei gitt oss ei oppdatering på statusen.
Publisert
Sist oppdatert
«Kvinnherad kommune har i vår fått tildelt eit tilskot på 300.000 frå Vestland fylkeskommune til restaurering av Prestabryggja, og tillegg er det avsett nokre interne midlar», skriv einingsleiar for prosjekt og utbygging Erlend Bøyum i ein e-post til Grenda.
Med finansiering i orden, har dei sett ut jobben med oppgradering av bryggja til Kvinnherad Bygg, som har sendt inn søknad om løyve til tiltaket. Før ein kan gå vidare med prosjektet må dei få tilbakemelding frå byggjesaksavdelinga og Vestland fylkeskommune.
Annonse
«Prestabryggja er plassert i KULA-område (kulturhistoriske landskap av nasjonal interesse, journ.mrk.) og det er generelt byggjeforbod i området, så prosessen tek noko tid, og vi må ha byggjeløyve på plass før vi kan setja i gang med restaurering», skriv Bøyum.
Folkehelsekoordinator og fagkoordinator for kultur Kristian Helgesen sendte også ei oppdatering i saka.
«Kvinnherad kommune sette av midlar til Prestabryggja i samband med rullering av idrettsplanen sitt handlingsprogram hausten 2022. Dette gav grunnlag for noko ekstern finansiering også. Finansieringa som Erlend syner til, vart til etter søknad hjå Miljødirektoratet, ettersom Prestabryggja høyrer inn under det statleg sikra friluftsområdet her», skriv han i ein e-post til Grenda.
