Oppdaterer brannsløkkingskurs med VR-utstyr: - Kan trena på mange ulike scenario

Frå 2027 har Norsk Brannvernforening bestemt at brannsløkkingsøvingar ikkje lenger skal gjerast med faktiske flammar i eit brannkar. Ein skal over på digitale øvingar. Det er det mange fordeler med, skal ein tru dei tilsette kurshaldarane i Petol AS.

– Ta ein kjøkkenbrann, og vel feil sløkkingsapparat, så får me sjå kva som skjer, seier Tommy Hauge medan han ser på kollegaen Olav Eger Hesjedal som har rigga seg til med VR-briller og eit sløkkingsapparat.

Det kjem ikkje noko ut av brannsløkkingsapparatet i Petol sine lokale der me står. Men på ein skjerm, ser me eit lite utsnitt av heile den verda som Olav Eger Hesjedal opplever inne i VR-brillene. Der inne er det mykje som skjer. Hesjedal brukar vatn for å prøva å sløkka flammene på ein komfyr, og får ein eksplosjonsarta brann «rett i fleisen».

– Eg får ta ein omstart, og velja rett apparat denne gongen, smiler Hesjedal.

Nye forskrifter

Petol AS driv med kursverksemd, og har nett fått seg nytt utstyr for brannsløkkingsøvingar. Fredag var det open dag, der gjester kunne få koma og forsøka seg på virtuell brannsløkking. Det er først og fremst av miljøomsyn at det kjem nye forskrifter om slikt utstyr.

– Står ein mange gonger på same plassen, og tømmer 10-20 apparat på ei øving, så blir det ein del utslepp som ikkje er bra for miljøet og omgjevnadane. Og me som jobbar med dette, blir kanskje òg litt utsett, forklarar Olav Eger Hesjedal.

– Forskriftene skal ikkje gjelda før i 2027, men me er jo ei miljøbevisst bedrift, så me vil no vera litt i forkant, smiler Tommy Hauge.

Hauge driv til vanleg med tilsyn av brannvernutstyr rundt omkring på bedrifter. Hesjedal er kurshaldar innanfor det som kallast varmt arbeid. Dette kurset må alle ta om dei skal arbeida med noko som gjev risiko for brann.

– Forsikringsselskapa krev sertifikat for å kunna jobba med varmt arbeid. Det kan vera folk i industri, oppdrettsnæring, om ein driv med sveising, vinkelslipar, varmluftpistol eller krympestrømpe rundt ein leidning, altså alt som kan forårsaka brann, seier Olav Eger Hesjedal.

Ein annan realisme

Med det nye utstyret, kan det også vera aktuelt med kurs for fleire sektorar. I den virtuelle brannsløkkinga kan ein nemleg velja mellom 65 ulike scenario som ein vil trena på. Ulike brannårsaker og omgjevnader krev ulike sløkkemetodar.

– Folk frå sjukeheimen kan jo koma her og trena på eit brann-scenario. Når me har øvingar ute med ekte flammar, pleier me jo berre å ha eit brannkar, me får ikkje inntrykket av ei sjukeseng som har begynt å brenna, eller ein komfyr eller lugaren i ein båt, påpeikar Tommy Hauge.

– Men vert det ikkje litt mindre realistisk når ein ikkje får varmen i fjeset og ser ekte flammar?

– Ein manglar strålevarmen, men på andre måtar kan det opplevast svært realistisk. Når ein tek dei brillene på seg, kjem ein heilt inn i den verda der inne, seier Olav.

– Eg får heller stå med ein hårfønar mot deg medan du held på, ler Tommy.

Hesjedal prøver seg på sløkking av ei celle i eit fengsel. Her kan me sjå den innsette som vil ut av cella si. Olav Eger Hesjedal vel feil prosedyre i situasjonen, og brått skvett han til og ropar. Den innsette har slått til han. Både at ein kan sjå folk i situasjonane, og høyrer lydar både frå brannen, frå sløkkinga og alarmar i bakgrunnen, er med på å gjera opplevinga meir verkeleg.

– Me reiser jo av og til ut til bedrifter for å ha opplæring, og då må me ha med oss mykje utstyr. No kan me jo berre ta med oss den svarte kofferten her, og så har me alt me treng. Tommy her har jo fått opplæring på dette, så no kan han òg halda kurs, smiler Hesjedal.

– Med dette utstyret kan eg no sykla rundt på oppdrag, flirer kollegaen.

Bedrift i medvind

Kurs for varmt arbeid er berre ein liten del av verksemda til Petol AS. Dei tilbyr både truckførarkurs, ulike kurs innanfor kranarbeid, fallsikring, og mykje anna.

– Me er ei lita bedrift, men svært innhaldsrik, smiler dagleg leiar Geir Ove Norheim.

Dei har kundar heilt frå Flekkefjord til Sogn, men dei fleste kundane held til i Sunnhordlandsregionen, og kan nokså lett koma seg til industriområdet der Petol har sine lokale.

– At me dreg opp passasjertalet på hurtigbåtane, er eg nokså sikker på. Det er mange bedrifter i regionen som sender sine tilsette til oss, seier Norheim.

Han står attmed far sin, Per Norheim, som har lang fartstid med opplæring.

– Det er han som er høvdingen, smiler sonen.

– Eg starta med undervising i 1984, då jobba eg på transportavdelinga på Søral, seier Per.

No har dei 12 tilsette, og mange oppdrag. Snart skal dei koma med endå eit nytt tilbod.

– Me har ei mobilkran, som me brukar til opplæring. No skal me i tillegg ut og tilby løfteoppdrag til folk som vil byggja noko eller kva som helst. Det nærmaste tilbodet for slikt er elles frå Haugesund eller Odda.

– Det høyrest ut som det går bra med Petol AS?

– Det går veldig bra, 2024 vart langt betre enn me hadde budsjettert. Det handlar mykje om at eg har gode lagspelarar her, det er ein god gjeng tilsette!, smiler ein nøgd bedriftsleiar.