Opnar turhytte i Myrdal

Søndag vert den nye turhytta ved Myrdalsvatnet opna. Hytta ligg idyllisk til i heimste enden av Myrdalsvatnet.

Prosjektet er ein del av geostien til Øvre-Myrdal, og følgjer såleis etter fjorårets lansering av eit omfattande hefte og oppsetjing av informasjonskilt på begge sider av elva.

– Det har vore eit ynske i mange år om å ha ein plass der store og små kunne setja seg inn og eta nista ved Myrdalsvatnet. Myrdal er eitt av dei finaste turmåla i nærområdet til Rosendal. Dessutan er dette den einaste staden der ein kan ro inn i nasjonalparken, seier Øystein Skaala i Rosendalstiftinga.

Prosjektet er drive fram av Rosendalstiftinga og Rosendal Turnlag - Turgruppa. I tillegg til eigenkapital, har Gjensidigestiftinga og Sparebank 1-stiftinga Kvinnherad bidrege med økonomiske midlar til heftet, skilta og turhytta. Arbeidet med sistnemnde starta i vår, og no står hytta fiks ferdig. Tømrararbeidet er utført av Ove Stokka.

– Vi må få takka grunneigar Svein Marken, som utan å sukka stilte tomt til disposisjon til dette ålmennyttige føremålet. At grunneigaren støttar opp på denne måten, er vi veldig takknemlege for, understrekar Skaala.

På søndag vert det gjeve informasjon om prosessen og om natur- og kulturhistoria i Myrdal. Det vert òg fyrt opp bål, og såleis høve til grilla pølser.