Opnar pub i Halsnøy kulturhus

– Det har vore armar og bein veldig lenge for å bli ferdig i tide, så eg har vore litt stressa siste dagane. Men no er me klare til å opna på fredag, lovar pubvert Sverre Olav Rygh.

60-åringen fortel om ein langdryg prosess frå idé til realitet.

– Eg trudde eg var ute i god tid, men tida gjekk. Eg fekk med søster mi til å hjelpa meg og vera stadfortredar på skjenkeløyvet. Leif Sverre Enes må rosast, for han var ein så positiv mann i denne saka, ein god pådrivar og hjelp for å få det til, skryt Rygh.

God hjelp

Men Sverre Olav har hatt hjelp av fleire for å nå opningsdagen på best mogeleg vis.

– Det har vore mykje jobb, men kjekt å få hjelp. Mellom anna har eg hatt god hjelp av nokon onkelungar og kompisane deira til å hjelpa til og ordna no før opninga, seier den tidlegare sjømannen nøgd.

Sverre Olav mønstra av for ti år sidan, og er 60 år no, men på ingen måte redd for å gå i gang no, trass alderen.

– Eg vil driva det som enkelmannsføretaket Zhet Wild Foods – oppkalla etter kona, for eg serverer også noko mat, Nordkapp-burgerar og viltskav i pitabrød. Løyvinga tilseier at eg kan ha enkel servering, så då blir det slik, opplyser han.

– Spent

Puben har lov til å husa 110. Sverre Olav siktar seg inn på eit vanleg utval i det han skal servera gjestene.

– Det blir jo spennande då. Er eg heldige med dei eg får med meg, så går dette greitt. Det er interessant å ha nokon ringevikarar på lista si, eg håper jo å kunna halda det ope året gjennom, så eg treng nokon å spela på, frir han.

– Eg er like spent som alle andre! Halsnøy-folket har bruk for eit tilbod, det har vore eit sakn her på øya. Eg må helsa til øybuane at dei må vera snille, og koma og bruka lokala, slik at det er større sjanse for at det blir verande. Målet er at folk skal kosa seg, seier verten, som har alle ambisjonar om å driva puben på seriøst vis.

– Viss ikkje så må ein vurdera om det er verd å driva, påpeikar han.

Han tar gladeleg i mot tips til kva han skal fylla kveldane på puben med. Quiz og karaoke er allereie lansert som tilbod. I tillegg skal Gaute Vaage – som dreiv puben i fjor sommar –levera øl frå sitt bryggeri slik at Sverre Olav kan servera det også til tørste gjester.