Opnar ny kafé i Skålagato

I dag opnar Kari Sunita Kumar dørene til Solvang Bar & Kafé i det tidlegare lokalet til Lille Tordivel i hjarta av Skålagato i Rosendal.

– Eg er sjølvsagt litt nervøs, men eg gler meg mest. Og eg er heldig, folk har vore kjempepositive og hjelpsame heile vegen. Dei har bygd bar, kome med tips og råd og støtta meg heile vegen, så eg må få lov til å takka innbyggjarane i bygda. Dei har vore imponerande positive og det har ikkje vore mangel på noko, seier Kari Sunita.

 

Mykje erfaring

Kari Sunita har brei erfaring frå bransjen, og har blant anna vore hovmeister på fjordhotellet og drive serveringsstaden Gjesten. Men då ho fann ut at dette lokalet var ledig, såg ho moglegheita til å endeleg få drive for seg sjølv.

– Dette blir kjekt. Det er jo dette driv med og kan. Og eg har alltid hatt lyst til å stå på eigne bein, så då eg fekk moglegheita her så slo eg til med eingong, seier ho.

Så sidan ho skreiv under papira 16. juni, har det vore travle dagar for Sunita. Ho skal driva staden sjølv, og blir inntil vidare den einaste tilsette.

– Det vert litt ta og føla på no i starten. Men planen er å ha ein open kafé og bar med enkel matservering, softis og kaffi. Så eg har brukt mi tid på å bli ven med softismaskinen kan du seia, ler Sunita.

 

Intimt og koseleg

Og er dette noko lokalbefolkninga liker, skal det etter planen vera heilårsdrift i den koselege og intime kafeen på hjørna av Skålagato.

– Ja, det er jo det eg vil. Men då er ein avhengig av at folk liker det ein driv med. Så eg er sjølvsagt lydhøyr og interessert i å lytta til kva lokalbefolkninga vil ha. Så er det jo klart at turistsesongen blir travlast, men det får koma som ein bonus. For dette er i all hovudsak tenkt på som eit tilbod til lokalbefolkninga, seier ho.

Med sitt retro preg og gamaldagse møblement får du ei kjensle av at du er på besøk hos bestemor når du stig inn i lokalet. Kari Sunita håpar at atmosfæren kan smitta litt av i stemninga.

– Ja, det er litt som i bestemor si stove. Og forhåpentlegvis blir det like koseleg her. Målet er at folk skal hygga seg og ha det triveleg saman. Og så er det jo ganske intimt, så her skal folk få sjansen til å bli godt kjent med kvarandre, smiler Kari Sunita.