Opnar meir opp for partnar på fødeavdelinga

Frå og med veke 22 vil partnar kunna vera med på ultralydundersøkingar og andre avtalar på poliklinikk. Partnar får også vera med på heile barselsopphaldet.

– Dette er vi mange som har venta på. No gler vi oss til å ta i mot begge to frå neste veke, seier klinikkdirektør for kirurgisk klinikk i Haugesund, Kjersti Tollaksen i ei pressemelding.

Helse Fonna opnar no for at frisk far/partnar kan vera med på alle polikliniske konsultasjonar på sjukehusa. Partnar får òg vera med på fødeavdelingane frå starten og på barsel.

– Men vi ynskjer ikkje å opna for fleire besøkande på barsel, skriv Helse Fonna i pressemeldinga.

Gjennom pandemien har partnar berre fått vera med på ultralydscreening og fått kome på besøk i visittida på barsel. Far har ikkje vore med på fødsel før kvinna har vore i aktiv fødsel, og det har heller ikkje vore lov å ha med partner på andre kontrollar på poliklinikken.

– No opnar vi for at partnar kan vera med under heile opphaldet, det vil seia under heile fødselsforløpet og heile dagen på barsel. Dette grunngjev vi med at dei fleste av våre tilsette er vaksinerte, og smittetrykket i regionen er lågt, seier seksjonsleiar ved fødeavdelinga på Haugesund sjukehus, Sidsel Petrine Vetås.