Opnar gardsbutikk på Ljosnes

Her har dei laga i stand gardsbutikk i det rehabiliterte stabburet på garden Josnes. I ei pressemelding frå det nye gardsutsalet står det å lesa at vareutvalet i starten vil ta utgangspunkt i varer produserte på garden sjølv, slik som kjøt, skinn, frukt og grønsaker.

Grenda har tatt turen til Ljosnes for å sjå den nye gardsbutikken, og undersøka nærare kva som står i hyllene. Sjølv er ikkje Elin til stades denne dagen, men Hans Petter viser rundt. Ved sida av bustadhuset deira står eit mindre, heilt nytt bygg. Det er her butikken skal vera.

Sidan 2020 har paret arbeidd med å byggja opp igjen gardsdrifta, i tillegg til å ha fulle jobbar. På noverande tidspunkt har dei både hest, grisar, geiter, høner, ender og kalkunar, samt storfe av den irske rasen Dexter. I samband med gardsbutikken er det kjøt frå denne storferasen dei satsar på å selja.Dexter er ein kortbeint og hardfør rase, med veldig godt kjøt, i fylgje pressemeldinga. Forutan låg feittprosent, vert det skildra som eit godt marmorert, møyrt og saftig kjøt. Storferasen går ute stort sett heile året, og kalvane går med mora og diar til dei vert naturleg av-vende.

– Grytekjøtet, kokt i 3-4 timar, er kjempegodt. Me kjem til å selja ulike typar kjøt, som t.d. sosekjøt, steik, ulike biffkvalitetar og kjøttdeig, m.m. Me har 200 kg vakuumpakka storfekjøt i frysen, seier Hans Petter nøgd.

Oriflame

Elles er det ingen kjøtprodukt å sjå i Stabburet enno, ettersom alt kjøtet ligg i frysen. Hyllene er derimot fylte av Oriflameprodukt.

- Ja, du kan vel seia at det går mest i kjøt og Oriflame i gardsbutikken nå i oppstarten, humrar Hans Petter. Oriflame er eit svensk selskap som sel kosmetikk og velværeprodukt til både menn og kvinner over heile verda. Elin vil også selgja desse produkta gjennom gardsutsalet. Som det står å lesa i pressemeldinga, vil det på torsdagskveldar vera høve til å delta på Oriflame-workshops, med demonstrasjonar av produkta.

Sal frå andre småprodusentar

Forutan varer frå Oriflame, ligg det også litt strikkevarer i ei av hyllene. Over ein stolrygg ligg eit geiteskinn. Dette gjenspeglar også noko av salsprofilen til gardsutsalet.Geiteskinnet kjem frå eigen gard, og planen er å selgja både geite- og storfeskinn. Strikkevarene er frå ein annan lokalprodusent.

– Me ynskjer å knytte til oss andre produsentar også etterkvart, slik at me ikkje berre har våre eigne produkt å selja. Andre småprodusentar er velkomne til å selja varene sine her, seier Hans Petter.

Elles er planen å følgja årssyklus når det gjeld kva varer me har. Me legg og opp til at det skal vera mogleg å bestille varer for neste sesong, noko som også gjer produksjonen vår enklare, sluttar Hans Petter. Gardsutsalet vil vera ope måndag- og torsdags ettermiddagar, samt føremiddagen laurdag.

Logoped

Elin er utdanna logoped, og driv, i tillegg til å jobba ved BUP på Husnes, sin eigen private praksis som logoped. Kvar måndag i vanleg arbeidstid vil ho derfor også ha logopedkontor i lokala til gardsutsalet, fortel Hans Petter. Besøket er over og me takkar for oss. Ute på tunet blir me møtt av ein liten, svart kattunge, som gir frå seg nokre spede forsøk på mjauing.

– Me har ein katt som ikkje kan mjaua, det er noko gale med han. Han treng visst også logoped, skjemtar Hans Petter idet me går.