Opna ny gapahuk med tindrande lys og julestemning

Etter at sykkelløypa vart offisielt opna i slutten av mars tidlegare i år har den vidare planlegginga og arbeidet med området på ingen måte stogga opp. Under ein vakker fullmåne i bitande kulde måndag denne veka skipa FAU til både nissejakt, minikonsert og ein varmande kopp både kakao og gløgg for å feira nybygget.

– Gapahuken har kome på plass i løpet av november månad takka vere byggmeisteren David Sjo, som gjorde alt saman på dugnad, med god hjelp frå FAU som også var med på dugnad. Og så er det Vidar Hvidevold som har teikna ho, fortalde FAU-medlem Liv Kari Sjøvangen.

– Me har også planar om å laga til ei grue i midten av gapahuken, men den kjem fyrst på plass når finansieringa er på plass, la ho til.

Velfortent heider

Men før konsert og talar kunne starta, tok «nissemor» med seg både store og små i jakta på «nissefar» som var forsvunne.

– NISSEFAR! ropa både store og små medan dei ivrigaste sprang og leita i både skur og skog.

Jakta gjekk på kryss og tvers over skuleplassen før ferda enda ved gapahuken der ein sovande «nissefar» endeleg kom til rette og festen kunne endeleg byrja.

«Nissefar» synte seg i realiteten å vera Roger Reigstad, som tidlegare den dagen ikkje visste at han kom til å portrettera den kjende og kjære figuren.

– Ja, eg vart «sjanghaia» til å vera med for berre nokre timar sidan, men det er veldig kjekt likevel, forsikra den nyrekrutterte nissen.

«Nissemor», eller Linda Røyrøy som ho eigentleg heiter, stemmer i.

– Det er alltid eg som er «nissemor», men «nissefar» kan vera litt ymse. Ho liker å byta litt på ho «nissemor», ler Røyrøy spøkefullt.

Før kakao- og gløggausene kunne gå for full maskin og minikonserten med Sølvi Berge, tok FAU-representant Silvia Tofte ordet for å ynskja velkomen og takka alle som hadde vore med og hjelpt gapahuken til å sjå dagens lys. FAU hadde også valt å heidra spesielt éin person litt ekstra, nemleg byggmeisteren sjølv David Sjo.

– Me ynskte å gje deg ein liten presang for alt det fantastiske arbeidet du har gjort, sa Tofte medan ho kom berande på ein julepynta gåvepose av relativt god størrelse. Oppi posen fann byggmeisteren ei jakke med påskrifta «David, Ildsjel og Dugnadsånd».

– Oi, i jøsse namn. Tusen takk, erklærte ein noko overraska men smilande Sjo. «Vel fortent» kom det frå fleire hald i etterkant i lag med rungande applaus.

Uteklasserom

Ein av skulen sine næraste naboar, som også er bestemor til nokre av borna, Frøydis Sjo hadde også valt å ta turen for å få med seg hendinga.

– Dette må no vere Kvinnherad sitt finaste skuleområde, og det er veldig kjekt å ha som nabo og ikkje minst at det skjer noko nytt i bygda vår. Det er alltid ungar her, området vert veldig mykje brukt og både borna og skulen er alltid positive, skrytte Frøydis smilande.

FAU-representant Silvia Tofte som stod like ved sa seg einig.

– Både skulen og borna er flinke til å bruka området her, og no er det ekstra kjekt at skulen kan ha både uteskule og uteaktivitetar sjølv i dårleg vêr. Då kan dei jo berre trekka inn under tak ved behov. Gapahuken har blitt laga med det i tankane at den også skulle kunne brukast som uteklasserom, poengterte Tofte.