Opna kantina og aukar kapasiteten

– Me kjem til å bruka kjøkkenet her mykje, det er eit godkjent kjøkken som me vil bruka til catering, arrangement med meir. Dette er med på å sikra heilårsdrifta vår.

Det seier Gjøa-sjef Resy Aak Thoresen om at restauranten utvidar matserveringa si til no også å gje dei tilsette ved Fonnafjord Næringspark kantine i heile arbeidstida deira.

Frank Søllesvik tok jobben med å ønska Gjøa velkommen til Seimsfoss då dei opna tysdag , og sa seg særs glad for at det endeleg er drift att i kantina.

– Det er viktig for næringsparken, for kantina er hjarta i parken. Det er her ein møtest på tvers av bedriftene som er held til her, sa hanog fleipa med at det var fleire som hadde blitt skrinnare i tida som har gått etter at Middagsknotten avslutta si kantinedrift.

Formidabel sommar

Gjøa kjem til å ha to tilsette fast på kantinedrifta no etter opninga, men kjøkkenet har dei allereie bruk i halvannan månad.

– Me har hatt ein formidabel sommar på Gjøa, og har trengt den ekstra kapasiteten dette har gitt oss. Me har betre plass her enn det er på kjøkkenet på Gjøa, og me har vore her sidan midten av juli og nytta oss av det, forklarer Thoresen som spanderte lunsjen på alle i denne dagen, saman med Fonnafjord Næringspark.

– Det er kring 130 på jobb her og som kan bruka kantina i deg daglege, men når ein reknar med dei som har reisejobbar eller har jobben sin ute i felten, så landar ein på rundt 250 som har dette bygget som si kontoradresse, fortel Søllesvik.

Han fortel også at kantina er open for, ikkje berre for dei 13 bedriftene som held til i bygget.

– Så det er jo ein kafé. Det merkar me også på at pensjonistgrupper har meldt at dei vil ha faste dagar her, sluttar Søllesvik.