Opna den nye uterestauranten
Torsdag inviterte Rosendal Fjordhotel til opning av det oppgraderte uteserveringsområdet.
Publisert
Sist oppdatert
Både hotellsjef Mari Anne Feet og styreleiar Iwan Knudsen smilte nøgd då uterestaurant-tilskota Baronen og Baronessen vart opna torsdag.
– Det har vore prioritert å oppgradera uteområdet og auka serveringskapasiteten, forklarer dei etter at hotellgjester og andre nyfikne hadde fått nytta seg av utvida delen.
Annonse
Historia er med
Annemor Brede, enka etter Rosendal Fjordhotel-gründer Alv Brede, fekk æra av å klippa snora då glaspaviljongen Baronessen vart opna.
– Eg syns det passa at me tok med hotellet si historie i dette høvet, og knyter saman fortid og framtid når me gjer oppgraderingar som denne, forklarte Feet.
Det nye tilbodet er noko som hotelleigarane har sett behov i løpet av tida dei har eigd fjordhotellet.
Annonse
– Me har hatt eit ønske om å kunna tilby uteservering til fleire, også når vêret ikkje er topp. Baronessen blir serveringsstaden for vår nye lunsjmeny, men det blir ikkje servert mat der etter lunsjen er over. Då er det Baronen som blir utealternativet for mat, opplyser Knudsen.
Baronessen er eit frittståande glashus med plass til i underkant av 40 gjester, medan Baronen heng saman med restauranten inne.
Løftar
Opninga 18. mai kom dagen etter at fleire enn det var plass til ynskte middagsbord på nasjonaldagen.
– På 17. mai hadde me 250 gjester til middagsbuffeen, og 30 på venteliste. Det hadde me ikkje klart utan ekstra plass og godt med servitørar til å ta seg av alt, forklarer hotellsjef Feet smilande.
Knudsen-brørne kjøpte Rosendal Fjordhotel i starten av 2022, og har allereie rekt å gjera store løft på både bygningsmasse og uteareal.
Annonse
– No har me fått lagt skifertak på heile hotellet, parkeringsplassen er asfaltert på nytt, ny heis er på plass og det vart gjort skikkeleg grunnarbeid før den nye uterestauranten vart bygd. Og med vindane som kan vera her, så må det heile fundamenterast skikkeleg, seier styreleiaren.
Hotellsjef Mari Anne Feet ser fram til at sesongen skal starta for fullt.
– Det er svært godt belegg på sengene framover. Me gler oss til å få hotellet fullt med gjester, sluttar ho.
