Opna BUA: – Har gledd meg til denne dagen

På Husnes har dei hatt BUA (Barn-Unge-Aktivitet) i fem år, og det har ifølgje Frivilligsentralen vore kjempepopulært. Difor vedtok Kommunestyret å utvida til Rosendal. Lokaliseringa vart i den gamle praksisfløya ved Rosendal ungdomsskule, og førre onsdag kunne dørene opnast for publikum.

Den 1. august starta Bente Nilsen i jobben som leiar for Frivilligsentralen i Rosendal. Ho kom frå tilsvarande jobb i Florø, der ho òg hadde ansvaret for BUA.

– Erfaringa mi er at dette er eit tilbod mange vil bruka. Eg trur det er kome for å bli, sa Nilsen då ho tok Grenda med på ei synfaring.

Lokalet er nyoppussa, og blitt svært så lyst og triveleg. Rommet der ustyret er utstilt, er fylt med alt frå slalåmski, randonee-ski, telt, soveposar, ryggsekkar, termosar og stormkjøken, til fotballar, basketballar, vaffeljern og redningsvestar.

– Vi har til og med høgtalarar, viss nokon ynskjer å ha musikk attåt aktiviteten dei vil gjera. Vi vil òg få inn ulike spel etter kvart. Akkurat no har vi mest vinterutstyr her, men vi manglar snowboard, men det kjem 1. desember, smilte Bente Nilsen.

Anbodsprosess

I alt er det kjøpt inn tur- og fritidsutstyr for 600.000 kroner etter ein anbodsprosess. Alt ser ut til å ha høg kvalitet. Finansieringa vart ordna med midlar frå Bufdir (Barne-, ungdoms- og familiedirektoratet) og Kvinnheradstiftinga. Kvinnherad kommune held på si side lokala til Frivilligsentralen og BUA og betalar løna.

– Kan kven som helst koma hit og låna utstyr?

– Ja, du må berre registrera deg, og så kan du låna utstyret i éi veke, fortalde Bente Nilsen.

– Eg har gledd meg til denne dagen, sa ho då den offisielle opninga nærma seg.

Som nemnt skal Nilsen òg drifta Frivilligsentralen i Rosendal. Målet hennar er å leggja til rette for ulike møteplassar, etter mottoet «menneske møter menneske».

– Viss nokon har lyst å laga til ein slik møteplass, må dei berre ta kontakt. Vi vil gjerne få vita kva det er behov for. Til dømes på «Bu trygt heime-dagen» kom ein eldre mann bort til meg og sa han hadde lyst til å spela gå-fotball. Så no skal vi starta opp med det etter jul. Og når treningane er ferdige, kan deltakarane koma bort hit og drikka kaffi, sa ei engasjert Nilsen.

Frå øyra til øyra

Ordførar Vegard Bjørnevik (H) hadde æra av å – ikkje klippa snora – men skjera opp det fyrste kakestykket.

– Å sjå BUA oppfylt av utstyr i alle sjangrar får ein gamal friluftsmann til å glisa frå øyra til øyra. No er det berre å bruka BUA, oppmoda han.

Til å drifta Frivillingssentralen sitt tilbod trengst det frivillige.

– Vi er veldig glad for at to superfrivillige allereie har meldt seg, men det er plass til fleire, opplyste Veronica Thorkildsen Thorsen, leiar i Kvinnherad frivilligsentral.

Også Rosendal speidargruppe var til stades under opninga. Dei held til i same bygninga, men stod for anledninga utandørs og grilla pølser og pinnebrød.