Opna brannstasjonen og fullførte brannvernveka

Førre veke var det nasjonal brannvernveke, og i Kvinnherad veka blir ofte avslutta med open brannstasjon ein eller annan stad i kommunen. Slik var det på laurdag også.

– I fjor var me på den nyopna stasjonen på Halsnøy, i år er me tilbake hit på hovudbrannstasjonen på Husnes. Denne dagen blir eit høgdepunkt for oss. Me er også rundt i barnehagar, og jobbar med å få fram bodskapen vår om kva som er viktig å tenka på, forklarte konstituert leiar for førebygging i Kvinnherad brann og redning Thomas Hallquist.

Førebygging

Han har ikkje eksakt tal på kor mange stader dei har besøkt i løpet av veka, men alle blir registrerte og rapporterte inn til direktoratet for samfunnstryggleik og beredskap som førebyggjande tiltak.

Denne laurdagen fekk store og små prøva å spyla med brannslange, fekk prøvesitja brannbil og prøva seg på ein quizrunde. Det var ikkje berre brannstasjonen som opna dørene denne laurdagen, både politi og ambulanse stilte seg til rådvelde, og opna køyretøya sine for nyfikne barn. Dei var det mange av.

Naboane Røde Kors opna også dørene, og stilte med ein kjærkomen kiosk.

– Det gjorde seg, for me hadde ikkje kapasitet til å gjera sjølv denne dagen, sa Hallquist.

Blant dei som gjorde ein innsats på den førebyggjande sida denne laurdagen var Benjamin Teigen. 27-åringen har fire år troppen, og losa store og små inn i ein av brannbilane som stod utstilt.

– Det er veldig kjekt og gjevande. Eg skal vidareutdanna meg i januar, fortalte brannkonstabel som jobbar ved Hydro Husnes mellom slaga.

– Me har godt besøkt dag. Noko eksakt teljing kjem me ikkje til å gjera, men eg tippar det har vore rundt hundre i på plassen til ei kvar tid, vurderte Hallquist.