Open gard – håpar på rekordbesøk

I 2022 strøymde store og små nyfikne til Open gard-arrangementet i Revuro i Omvikdalen.

– Då kom det 750, og det var folk frå heile kommunen, noko me syns var veldig kjekt. Me håper sjølvsagt på eit besøk som er minst like bra i år, smiler bonde og arrangør Johannes Hjelmeland.

Maskinar og grisar

– Me har landa på at me ville ha Open gard på ein dag med fint vêr, så me har bokstaveleg tala lege litt på vêret og venta på ein fin nok laurdag til å arrangera. Opphavleg var planen å skipa til i august, men der var det uråd å finna vettug vêr. No er meldingane lovande, og helga ser ut til å bli perfekt for vårt arrangement, meiner bonden.

Open gard-konseptet skjer i bondelagsregi over heile landet, men lokalt det er noko Lauvsprett 4H, bygdekvinnene og Omvikdalen Bondelag som er saman om det.

– 4H og Omvikdalen Bygdekvinnelag står for maten, medan me bøndene tar oss av å visa fram både dyr og maskinar som er på garden, seier Hjelmeland som i tillegg til storfe i variantane ku og kalv også kan skilta med sauer, kaninar og grisar.

– Det er mest for barna me gjer dette, men det er også eit element av vaksenopplæring i å visa dette fram til foreldre deira, legg Hjelmeland til.

– Korleis løyser ein parkering når de skal ha rekordbesøk?

– Me kjem til å ha parkeringsvakter og vil organisera det. Alle er ikkje på plass samtidig og me har ein plan på korleis me vil gjera det på laurdag, slår Hjelmeland fast.