Ope møte om kreftomsorga i Kvinnherad kommune

– Vi treng meir fokus på tida etter behandling. Det som går igjen hos fleire av dei eg har snakka med, er kjensla av å berre bli kasta ut i livet igjen. «Dei berre sleppte meg», seier dei. Sjølv om ein er ferdig med behandling og kvitt kreften, så er det kanskje framleis mykje ein slit med, seier Astri Måkestad.

Ny rettleiar skal sikre oppfølging av kreftpasientar i kommunehelsetenesta

I regi av Uskedal Helselag, Rosendal helselag, Rosendal bygdelag, Seimsfoss grendalag og Omvikdalen bygdekvinnelag inviterer Astri Måkestad og Bente Haugen til open dag om kreftomsorga i Kvinnherad i samfunnshuset i Rosendal.

Innleiinga blir ved Geir Vangsnes, som er distriktsleiar for Bergen i Kreftforeininga i Vestland, ein representant frå Kvinnherad kommune og kreftkoordinator i Ullensvang, Hege Lyssand.

Etter innleiinga blir det paneldebatt der kommuneleiinga og alle politikarane er invitert.

– Vi vonar det blir full sal, og at det kjem mange med gode spørsmål til debatten, seier Astri.

– Det er viktig med eit ope møte der folk kan komma med sine tankar og ynskjer, der ein får sagt det ein har på hjarta i eit forum som kanskje kan føra til endring, legg Bente til.

Gav omfattande svar om kreftomsorga

Det trengs ein kreftkoordinator

Dei to damene fortel om eit godt samarbeid med kreftsjukepleiar i Kvinnherad kommune, Marit Sjøvangen, som òg vil vera til stades. Grenda har tidlegare skrive om hennar arbeid. Tidlegare hadde Kvinnherad òg ein kreftkoordinator, men den stillinga finnest ikkje lenger.

– Ullensvang såg til Kvinnherad då dei skulle innføra kreftkoordinator. La oss berre sei det slik at dei ser ikkje til Kvinnherad lenger, seier Astri.

Etter det Astri kjenner til, betalte kreftforeininga løna til kreftkoordinatoren, og når det var på tide for kommunen å betala det sjølve vart det ikkje prioritert.

– Målet vårt no er å få til ein god plan, ikkje berre på papiret, men også i praksis. Å få til ein kreftkoordinator i 100% stilling er det høgaste målet. Når ein kjem heim etter behandling så føler ein seg aleine, og det er vanskeleg å vita kor ein skal venda seg, seier Astri og Bente.

Dei meiner at ein kreftkoordinator kunne gjort stor skilnad i liva til mange menneskje. Mellom 900 og 1000 personar i Kvinnherad er råka av kreft, noko som utgjer om lag 8% av befolkninga i kommunen. Slik det er no, med ein kreftsjukepleiar i berre 20% stilling, kan det fort bli til at ikkje alle blir teken lika godt vare på.

Vurderings- og koordineringseininga: – Dette er døra inn til dei kommunale helsetenestene

– Det finnest ei lang liste med plassar ein kan ringa. Vi har Frisklivssentralen og fleire andre gode tilbod, men det er vanskeleg å vita om alt, og å vita kva som kan passa for den enkelte. Av og til veit ein ikkje eingong kva ein treng, seier Astri.

Å ha berre ein person ein treng ta kontakt med, kan letna ei allereie tung bør, meiner Astri og Bente. Dei tykkjer også at dei barna som er råka av kreft, anten dei har det sjølv eller har foreldre som er sjuke, fortener betre oppfølging og rettleiing.

Eit møte for alle

Initiativet har fått veldig god respons. Fleire tykkjer det er flott at det blir sett fokus på omsorg i tida etter kreften.

– Vi har fått veldig positive tilbakemeldingar, og mange gode og støttande ord, seier Bente.

– Det er ikkje alle som har overskot til å arrangera på ting og ta opp slike kampar, difor er det ekstra viktig at dei av oss som har overskot brukar det til å jobba for at andre skal ha det betre, legg Astri til.

Astri og Bente vil presisera at dette møtet er for alle og ein. Ein treng ikkje ha kreft eller vera pårørande for å møta då dette er eit tilbod for alle i kommunen.

– Kreft er eit stort problem i befolkninga, så dette blir som ein folkeopplysning, seier Bente.