Ope møte om gang- og sykkelveg til Steinsletto

Uskedal Utvikling inviterer til ope møte onsdag 15. september i Gamleskulen, med tema gang- og sykkelveg Uskedal Bru – Steinsletto.

Styreleiar i Uskedal Utvikling Remi Onarheim vonar på godt frammøte.

– Det gjeld særleg foreldre, grunneigarar og andre som bur langs fylkesvegen, men også alle andre som brukar vegen og ser kor trafikkfarleg det er på denne strekninga. Gang- og sykkelveg til Steinsletto og Børnes Næringsområde er avgjerande for vidare utvikling, og det få til ein trygg skuleveg for borna og for alle som tek seg fram til sentrum for handel eller andre tenester, seier Onarheim til uskedalen.no.

Onarheim ynskjer å få til ei lokal prosjektgruppe med medlemer frå lokalmiljøet som særleg jobbar inn mot kommune og politisk nivå. I framlegg til reguleringsplan Børneset er det regulert inn nokre hundre meter med gangveg frå busslomme til avkøyrsle til bustader. Det kan vera ein god start. Representant frå Kvinnherad kommune vert invitert til å vera med på møte.