Ønskjer velkommen til kyrkjekonsert i Rosendal

Søndag vert det haustkonsert i Kvinnherad kyrkje. Arrangørane fristar mellom anna med satsar frå Faure sitt requiem, tonar av Olav Gjeilo, musikk frå 1500-talet og nokre duettar.

Det er blandakoret Cantus Firmus og Vokalensemblet Glimrah som inviterer til konsert.

Cantus Firmus, som har sunge i lag i seks år, vert dirigert av Rebekka Attramadal. Repertoaret deira består hovudsakleg av kyrkjemusikk, og på søndag har dei med seg Eva Megyesi på klaver. På den komande konserten lovar dei mellom anna nokre satsar frå Faure sitt rekviem, musikk av Olav Gjeilo, samt folkemusikk.

Vokalensemblet Glimrah har også sunge saman i seks år. Repertoaret deira spenn frå tidleg musikk og folketonar til samtidsmusikk. På søndag vil dei mellom anna syngja musikk frå 1500 talet, nordiske folketonar, samt nyskriven musikk av Kjersti Follesø frå Stord. Maria Malmsten er syngjande dirigent for Glimrah.

Malmsten skal også vera delaktig i duettane som er lova denne kvelden. Desse skal framførast i lag med Ingvild Toskedal. Hallgjerd Kofoed Hegland er konferansier for arrangementet.

– Dette er den første konserten som Cantus Firmus og Vokalensemblet Glimrah arrangerer saman. Me gler oss stort og ynskjer alle hjarteleg velkomen til konsert i Kvinnherad katedralen, inviterer kora i ei pressemelding.