Ønskjer byggverk til peparkakelandsbyen
I fjor vart peparkakelandsbyen i Folgefonnsenteret ein stor suksess, kor mange av dei kjende, lokale landemerka var representert.
Publisert
Sist oppdatert
Trass i suksessen for eitt år sidan, siktar dei denne gong mot stjernene:
– I år tenkjer me den skal bli endå større og flottare!
Annonse
Folgefonnsenteret håpar mange vil bidra med byggverk til årets peparkakelandsby.
– Om du ynskjer å lage ein attraksjon frå Kvinnherad eller Folgefonna Nasjonalpark så er det ekstra kjekt, men alle bidrag vert motteke med glede, inviterer dei.
Dei tek i mot byggverk til landsbyen fram til tysdag, 23. november. Sist gong var blant anna desse attraksjonane konstruert utav julebakst: Baroniet i Rosendal, Festidalen, Fonnabu, Steinparken og Malmangernuten.
Kanskje ein i år får presentert den nye dagsturhytta ved Nautavatnet, eit seniortun, ein brannstasjon eller ein heildagsskule? Eller kanskje ein Instagram-venleg foss eller den like fotograferte båten på Bondhusvatnet?
Annonse
Peparkakelandsbyen blir ærverdig opna av ordføraren Hilde Enstad, laurdag 27. november. Då er det duka for fleire timar med julestemning i og utanføre Folgefonnsenteret.
