Ønskjer å utvida tilbodet for å treffa fleire
Ønsket om å vera ein plass for meir enn berre dei seine timane har fått Bar-On til å utvida lokalet og satsa breiare.
Publisert
– Me har fått ord på oss for å vera ein plass for ungdommane, men me ynskjer å utvida tilbodet slik at ein når ut til ei ekstra gruppe, og med det få det som ein restaurant ville kalla eit ekstra bordsete, seier Bar-On-sjef Anders Gaute Kristensen.
Pussar opp
Annonse
Det er ein barsjef med hettegenseren full i malingsflekkar som møter Grenda denne februardagen.
– Me gjer ein del sjølv, og prøver å gjera det samtidig som me har drift i helgane. Dermed blir det mykje rydding og flytting. Eg trur me har igjen for å gjera det skikkeleg, seier han.
Blant anna har han – med hjelparar – pussa opp og utvida med eit lite «Vip-rom». Eit ni-fots biljardbord er på plass, saman med dartskive. Truleg vil han fylla på med meir.
– Det manglar aktivitetar i Rosendal, føler eg. Dette rommet betyr eit ekstra tilbod, og det vil gjera det meir romsleg her enn me har hatt det til no, vurderer Kristensen.
Annonse
Ute i barlokalet står framleis scenen, og der skal det framleis framførast musikk.
– Når ein kjem opp i 60-70 personar her inne, så blir lydnivået heva opp også, sjølv utan musikk frå scenen. Då kan mange ha ønske om å trekkja seg litt vekk for å føra samtalane vidare, påpeikar han.
Tre år
Han erkjenner at baren har fått ord på seg for å vera ein plass for ungdommane, eller dei som kjem ut seint, som barsjefen sjølv vel å kalla det.
– Men me treng å tilby litt meir også. Eg trur på god underhaldning. Neste helg kjem Geir Halleland Trio og spelar, slik at me får gitt eit godt tilbod også tidlegare på kveldane i helga. Eg har dialog med to-tre andre besetningar også, som eg vil ha inn til å spela ved andre høve. Me kan ikkje berre seia «kom på laurdag», det må vera noko meir enn det me tilbyr, tenkjer han høgt.
Til sommaren er det tre år sidan han starta opp Bar-On. Det har gått bra, tykkjer Kristensen.
Annonse
– Me ser kva som er potensialet. Me har kanskje stabilisert oss gjennom våre år, men landskapet rundt oss endrar seg heile tida, seier han og siktar til både eigarskifte på Rosendal Fjordhotel, opning av Salmon Eye og Iris Restaurant, for å nemna noko.
– Sånn sett satsar me litt i ei tid som ikkje er høgsesong. Me må jo sjå at det betalar seg over tid, men me må prøva litt og ta den risikoen det utgjer for oss. Me håper jo sjølvsagt at me klarer å få folk ut på desse arrangementa me drar i gang, sluttar Anders Gaute Kristensen.
