Ønskjer å byggja opp til 32 bueiningar i Rosendal sentrum

Den store, opne grusplassen tett på elva ved Skåla bru i Rosendal har vore vurdert til ulike former for bygningsmasse dei siste ti åra. Tilbake i 2015 stod Kjetil Helvik, som ein av grunneigarane til arealet, fram i Grenda og fortalte om planane om å byggja rekkehus med opp til 20 bueiningar på området.

Seinare var det ein lengre prosess for å Felleskjøpet til å etablera seg på område, der mellom anna kryssplassering for innkøyring ved Skåla bru var blant dei kompliserande faktorane.

Elvepromenade

Naboar har no fått varsel om oppstart av arbeid med privat reguleringsplan for området.

– Føremålet med planarbeidet er å etablera eit nytt bustadfelt med inntil 32 nye bueiningar, fordelt på to leilegheitsbygg med inntil ti bueiningar i kvar, og tre firmannsbustader, skriv Byggadministrasjon Harald Bjørndal as i varselet som er sendt ut.

– Me førebur det vidare arbeidet no. Me har hatt geologar i sving, fått gjort flaumrapportar og legg opp til mykje fornying i området, seier Kjetil Helvik til Grenda.

KE Invest, som han eig saman med Marianne og Knut Johannes Helvik, kontrollerer 50 prosent av Vangsholmane bustadområde. Tommy Røssland og Tananua as har 25 prosent kvar.

Blant fornyinga som er planlagt, går det fram av varselet at ein gangveg langs elva skal lagast til, noko som forlengjer elvepromenaden som går langs nordsida av Rosendalselva frå utløpet opp til Skåla bru.

– Gangvegen vil gje tilgjenge til ålmenta, slik at ein kan sikra samanhengande elvepromenade frå sentrum og opp til Baronivegen, og vidare med koplingar til både Steinparken og Baroniet, skriv Byggadministrasjon Harald Bjørndal as.

Rekkefølgjekrav

Planområdet er på 22,6 mål, men inkluderer også dei eksisterande bustadane som er i området mellom elva og Baronivegen. Arealet som skal byggjast ut er i underkant av 10 mål.

Det har vore gjort flaumfarevurdering, og kartlagt og sett ei flaumsone i planområdet, går det fram. Sunnfjord Geo Center har gjennomført ei utgreiing om konsekvens av tiltak i denne flaumsona, og har kome med avbøtande tiltak som medfører at planlagt bustadområde blir heva over flaumsoneområdet.

– Dette vert sikra gjennom rekkefølgjekrav i planframlegget. Med tanke på trafikktryggleik er det ved å nemna at planframlegget legg opp til tilkomstveg frå Baronivegen, og ikkje frå Skålagato, slik førre planforslag for denne eigedommen gjorde, blir det understreka i varselet.

– Me har allereie gjennomført informasjonsmøte med naboar der me har fått konstruktive innspel på utforming av bustader og området generelt. Dette er noko me tar med oss til vurdering i den vidare planprosessen, avsluttar Helvik.