Onsdag klokka 12 går alarmen – også på din telefon
Det er ingen grunn til panikk om det uler og ristar i telefonen din ein gong mellom klokka 11.55 og 12.10 i morgon. Det er berre ein landsomfattande test som føregår.
Publisert
Det er politiet som sender ut test av nødvarsel på mobil. Samtidig skal Sivilforsvaret testa tyfonane sine med signalet «Viktig melding – søk informasjon». Varslingsprøven vil føregå i heile Norge på same tid.
«Det betyr at mobiltelefonar i heile landet vil vibrera og spela av eit høgt lydsignal, samtidig som tyfonane uler», vert det opplyst på nettsida Nodvarsel.no.
Annonse
Det vert understreka at testen går ut til alle nyare og oppdaterte mobiltelefonar og einingar som oppheld seg i Norge og som er kopla på 4G eller 5G.
«Hugs å oppdatera telefonen din, slik at du har den nyaste programvara frå operatøren din. Viss du ikkje har ein oppdatert telefon med dei nyaste oppdateringane, kan det henda du ikkje mottar testen», står det på nettsida.
Det som konkret skjer er at mobiltelefonen vil byrja å vibrera og spela av ein høg, sireneaktig lyd i cirka 10 sekundar. I tillegg vil det koma opp ein tekst på skjermen som fortel at det er ein test. Hadde det derimot vore ein reell situasjon, ville meldinga informert om kva som skjer og kva du bør gjera for å beskytta deg sjølv.
