Omvikdeling vert dagleg leiar for serveringsstad i Bergen

Sæberg skal nemleg vera dagleg leiar for den nye utestaden, som har fått namnet Rebel. Ho er mellom anna på lag med Michelin-kokk Morten Tungesvik, Marius Larsen, Thomas Johnsen og Christoffer Hammerås. Det er Sæberg og Hammerås som vil vera på huset.

– Biggie, eller Christoffer, er barmanageren min. Han er ein larger than life person som eg er så glad for å ha med på laget, fortel Bente Marit på telefon frå Bergen.

Ny vri på klassiske oppskrifter

Barmenyen, som dei skal leika seg meir med i dagane som kjem, vert i følgje Sæberg innovativ, sjølv om dei også vil tilby klassiske drinkar.

– Biggie lagar originale drinkar frå eigne oppskrifter, og desse er spanande og nye, forklarar ho.

Dette prinsippet gjeld også for maten. Michelin-kokk Tungesvik er Rebel sin konsulent på dette feltet. Menyen vil bestå av tradisjonelle matrettar frå heile verda, med nye tvistar og norske råvarer, til dels lokale produkt og kortreist mat.

– Det blir satsa på gode råvarer, kor me kjenner leverandørane. På den måten veit me at råvarene våre kjem frå seriøse aktørar som tek dyrevelferd på alvor. Med det får me støtta dei lokale bøndene. Det blir til dømes ikkje oppdrettslaks på menyen. Me gjer kanskje ikkje mest, men me gjer iallfall noko.

Med slike råvarer og ein meny-konsulent som har feriert i Rosendal sidan han var gutunge, lovar Sæberg rettar som blir heilt ville, der mellom anna ein ny, norsk vri på steak sandwich blir nemnd.

Over to etasjar blir det servering sju dagar i veka, med satsing på gode lunsj- og brunsjrettar på dagtid, samt sharing mat og bar på kvelden. Uteservering vil det også bli. I helgene satsar dei meir på det sosiale og vil ha nattope.

Må vera modig

Bente Marit har jobba i serveringsbransjen i 10-11 år, og kjenner miljøet godt. Ho har fleire gode folk i ryggen, som no har genuin tru på at ho skal klara jobben som dagleg leiar for Rebel.

– At Marius Larsen og denne gjengen har tru på at eg kan klara dette og backar meg er utruleg godt. Dessutan er det fleire som har klart å vera leiar før meg, og viss andre kan klara det så kan eg også få det til. Det er kjempeskummelt og veldig spanande, men ein må vera litt modig. Eg likar jo dessutan ei god utfordring, fortel ho vidare.

Det raude bygget, som tidlegare var basen til reisebyrået Kilroy, er 170 år gamalt og har stått tomt i seks år. No vert det arbeidd på spreng for å nå den planlagde opningsdatoen, 15. juli. Bente Marit fortel at noko av magien i serveringsbransjen er at det kan sjå ut som ein byggjeplass dagen før, men likevel vera mogleg å opna dagen etter. Mykje uføresett kan skje fram til den tid, så datoen er ikkje heilt sikker.

– Men det er denne datoen me jobbar mot, stadfestar Sæberg.

Sjølv om lokala i dag gjennomgår ei heftig oppussing, reknar dei med å vere klare til å opne Rebel om ein månad. Det er enno ikkje lov å røpa korleis stilen blir innvendig, men Bente Marit omtalar det som avslappa, ope, fargerikt og grønt.

– Det skal vera eit friskt pust å koma inn der.

Avslappa stemning

Omvikdelingen gler seg til å koma i gong med Rebel, kor dei har lagt opp til ein soft start. Sidan det vart kjend at ho skulle vera med, har ho fått mange helsingar frå heimkommunen, av folk som gler seg til å koma.

– Me skal ta i mot alle som kjem med opne armar! Eg blir heilt rørt av støtta me har fått. Det vitnar om at folk er klare for at samfunnet opnar igjen.

Sæberg vil jobba mykje på golvet sjølv om ho er leiar, og ho gler seg til å læra frå seg det ho kan om og frå servicebransjen. Ambisjonen er at personalet skal få stoltheit, tryggleik, kunnskap og sjølvtillit i jobben, som ho sjølv er både engasjert og glad i. Ønsket er å skapa ein koseleg plass, for eit vakse klientell over 25 år.