Omstridt cruiseskip vitja Kvinnherad

Cruiseskipet «Deutschland» har vore fast gjest i Rosendal gjennom fleire år. Måndag kom det attende, etter å ha fyrst vitja Ulvik. Klokka 20.00 sigla det vidare til Maurangerfjorden, før kursen vart sett utover igjen. Tysdag føremiddag låg «Deutschland» rett sør for Sotra. Etter planen kjem fartøyet attende til Rosendal på laurdag klokka 17.00.

Bergens Tidende har skrive fleire artiklar om «Deutschland» den siste tida. Årsaka er at skipet ikkje er ynska i Bergen, fordi det er relativt gamalt og såleis forureinar meir enn moderne skip. Men både i Øygarden og i Haugesund er fartøyet velkome.

– Det er uheldig om nokre skip som ikkje møter hamna sine miljøkrav, likevel får anløpa andre kaiområde i regionen der det ikkje vert stilt tilsvarande krav, sa hamnedirektør i Bergen, Michal Forland, til BT tidlegare i sommar. Han la til at «Deutschland» er eit av cruiseskipa med lågast miljøscore i norske hamner.

Forbanna tull

– Det er noko forbanna tull at eg ikkje skal kunna ta imot cruiseskip her i Øygarden. Nokon bør setja seg ned og rekna på kor mykje forureining cruiseskipa slepp ut på veg inn til Bergen. Samtidig som eg får støy om miljøutslepp, går hundrevis av cruiseskip langs kysten og inn i fjordane utan at det fører til bråk, kontra Willy Tveit, eigar av hamna i Austefjorden i Øygarden.

Tveit opplyser også at «Deutschland» visstnok skal slutta i cruisetrafikk, og frå neste år over i teneste som skuleskip.

Ordføraren i Øygarden seier til BT at det må koma nasjonale retningslinjer om ein skal hindra utslepp frå hamner i kommunane.

«Deutschland» stod ferdig i 1998, og er innvendig dekorert i stilen frå 1920-åra. Skipet har plass til 650 passasjerar og eit mannskap på 260.