Omstock er klare med påskeprogrammet

Den fyrste laurdagen, dagen før palmesundag, kan ein få med seg både Ole I’Dole Evenrud og coverbandet GoodFoot.

– Pop-legenda frå 80-talet med hits som «Det va’kke min skyld», «Viss eg var deg» og «This town ain’t big enough». Ole kjem til Husnes for fyrste gong på over tjue år og skal gjera ein akustisk konsert med sine beste låtar, samt elleville historier frå eit popstjerneliv verda rundt, fortel Trond Betten i ei pressemelding.

Etter konserten er det coverbandet GoodFoot som inntar scena.

– GoodFoot vert omtala som eit verdas beste coverband av rockehits, og leverer kjende låtar frå band som Bon Jovi, Van Halen, Roxrette, Whitesnake, Bryan Adams, Aerosmith og mange fleir. Me gler oss til ein kveld med mimring, latter og allsong, uttalar Betten vidare.

Internasjonale

Frå kjende og kjære trakter fyrste helga, vender dei èi veke seinare skuta utanlands med to internasjonale artistar.

– I år har me funne gull, og dei heiter Hungarian Rhapsody og er eit ungarsk tribute-band til Queen. Dette bandet gneistrar når dei leverer historias største og mest ikoniske låtar. Vokalisten er med i ein musikal om Queen, og har blitt rost opp i skyene av dei originale Queen-medlemane Brian May og Roger Taylor, seier Betten i pressmeldinga.

– Etter at røykskya har lagt seg vil de så få møta ein artist ved namn Alex Harry. Dette er etter vår meining verdas beste trubadur. Denne mannen har ei stemme som er så sterk og kraftfull at han er ei nyting å høyra på. Me klarer ikkje å venta med å få vist dykk denne mannen, legg han til.

Omstock er basert på friviljug arbeid og dei jobbar hardt for å betra kulturtilbodet i kommunen.

– Me har registrert ein debatt den siste tida om mangel på kultur og uteliv på Husnes og i Kvinnherad. Difor har me bestemt oss for å setja opp seks arrangement frå mars til mai. Me håpar folk vil setja pris på tilbodet og at det blir like kjekt for dei som me håpar og trur det vil bli, avsluttar Betten.