– Omstendeleg arbeid å finna smittekjelda

Per dags dato er det tre personar som har vorte smitta av Salmonella i kommunen, alle av typen Salmonella Agona. Denne varianten av mage-tarmbakterien har ein ikkje hatt utbrot av i Norge tidlegare. Ein har berre hatt sporadiske tilfelle av denne typen, då i samband med importsmitte frå utlandet.

– I utlandet har slike utbrot vore knytt til mellom anna agurk, papaya og særleg kjøt. Me veit ikkje enno kvar smitten kjem frå her i landet, seier Opland.

Opland fortel vidare at kommuneoverlegane samarbeider med Mattilsynet og FHI om å finna smittekjelda, ved å gå gjennom datamateriale som dei har fått inn. Dette er eit omstendeleg arbeid, som strekkjer seg tilbake i tid. Også Veterinærinstituttet tek del i dette samarbeidet.

– Arbeidet inneber å snakka med dei som er smitta, og henta inn opplysingar om kva dei har ete gjennom spørjeskjema, seier Opland.

Også kvitteringar og detaljar frå nettbank vert gjennomgått, for å finna ut kvar pasientane har vore.

Truleg smitte frå matvare

Til nå er 58 personar smitta med Salmonella Agona på landsbasis, fordelte over fleire fylke. 14 av tilfella er i Vestland. Dei smitta er i alderen 1 til 88 år. Dette kan ein blant anna lesa på NRK Vestland sine sider.

Her seier også Preben Aavitsland, fagdirektør i FHI, at det kjennest ubehageleg at smitta framleis kan vera der ute gjennom ei matvare som dei enno ikkje har klart å kartleggja. Kan hende vert det heller ikkje mogleg å finna smittekjelda, i følgje Aavitsland.

Truleg dreier det seg om eit næringsmiddel som er distribuert over heile landet. Mattilsynet kjem med følgjande tips for å hindra smitte av salmonellabakteriar:

– God kjøkenhygiene og god handhygiene

– Er ein sjuk med diaré, skal ein unngå å laga mat til andre.

– Ein bør varmebehandla matvarer. Tilstrekkeleg koking eller gjennomsteiking dreper Salmonellabakteriane.

– Skyl og vask frukt og grønsaker som det ikkje er mogleg å varmebehandla før du et dei. Når det er mogleg er det også ein fordel å tørka dei.