Områdeplanen for Sunde er ute på høyring

Det har vore ein lang prosess fram til endeleg planforslag for Sunde tettstad. Planarbeidet vart lagt fram i planforum fyrste gong i september 2019, og oppstart vart varsla i april 2020.

I møtet 15. oktober kunne endeleg Plan-, teknikk- og miljøutvalet gjera vedtak om å senda planen ut på høyring. Alle politikarane røysta samstundes for at det må leggjast til rette for utviding av eksisterande båthamn i Sundsvågen, og at dette vert innarbeida i planforslaget.

Det nye planforslaget inneber oppheving av fire eksisterande reguleringsplanar, deriblant gamle planar for Sunde sentrum og Sunde båtlag. I tillegg skal deler av tre andre planar opphevast.

Tilgjenge til sjø

«Sunde skal vidareutviklast som ein attraktiv tettstad. Kollektivaksar og gang- og sykkelvegnettet skal forbetrast. Ein skal ta vare på og vidareutvikla alle dei særkvalitetar som Sunde har. Uterom og offentlege rom skal ha høg kvalitet», står det på Kvinnherad kommune si heimeside i samband med offentleggjeringa av høyringa.

Det vert vidare vist til at Sunde har ei rik historie, og ein gong var ein svært aktiv tettstad.

«På 1800-talet var Sunde den mest folkerike staden i Sunnhordland, og staden var òg svært aktiv utover på 1900-talet. Staden var eit trafikknutepunkt for båt/ferjetrafikk i Sunnhordland. Tettstaden Sunde har i dag få funksjonar utanom det å vera eit bustadområde i nær tilknyting til regionsenteret Husnes», heiter det.

Kommunen opplyser at ei av hovudutfordringane i prosessen er å få på plass areal til teknisk infrastruktur med trafikksikring med gang- og sykkelveg. Også tilgjenge til sjø for ålmenta blir sett på som viktig.

Kvinnherad kommune er forslagsstillar for planen. Plankonsulent er Norconsult i Bergen.

«Planen er utforma som ei områderegulering, og skal difor leggja grunnlag for den vidare planlegginga med å definera dei overordna rammene for Sunde sentrum, med grønstruktur, samferdsle, friluftsområde, offentlege tenester og anna», vert det understreka.

Frist for å senda inn merknader er sett til 20. desember.

Kostnaden

I PTM-møtet spurde leiar Øyvind Hardeland (Ap) om kostnadane for arbeidet med planen; både kommunen sine interne kostnadar og til innleigd konsulentbistand. Administrasjonen svara at ein har lagt til grunn eit samla finansieringsbehov på kroner 2.150.000, fordelt på 400.000 i eigeninnsats og 1,5 mill. til konsulent.

«Til no er det estimert at eigeninnsatsen har ein kostnad på 164.116,- kroner, og det er rekneskapsført konsulentbistand på kr. 979.520,36. I tillegg kjem reiseutgifter, annonsering og utgifter til politisk behandling som ikkje er kalkulert, men truleg har ein samla storleik på cirka 50.000 kroner. Samla utgifter så langt er med det cirka 1,2 mill. kroner», står det i protokollen frå møtet.