– Om lag ein redningsaksjon i veka
Lensmann Sigurd Børve måtte igjen sjå at mannskapa hans fekk eit redningsoppdrag i Kvinnherad-fjella.
Også denne helga måtte redningshelikopter, politi og Røde Kors Hjelpekorps i sving for å berga turfolk ned frå fjellet.
Artikkelen held fram under annonsen.
– Ser me sommaren under eitt, så ligg me på om lag ein slik redningsaksjon i veka, svarer lensmann Sigurd Børve når Grenda spør om redningsfrekvensen.
Stod fast i fjellhylle
Fredag var det to personar som stod fast på ei fjellhylle i Ulvanåso. Sparsamt med klede, tett tåke og uvisse kring vegen vidare tvang dei til å ringja etter redning. Redningshelikopter kom til Uskedalen, men den omtala tåka stoppa deira høve til å redda dei ut.
Etter ei stund kom det to klatrarar til forbi same plassen, og gruppa på fire kom seg til slutt ned like før klokka eitt om natta. Då var både Røde Kors og politiet gått dei i møte, og via telefon hadde dei fått losa dei rette vegen.
– Førebuing
Børve legg seg på ei diplomatisk linje når han omtalar redningsaksjonane.
– Det er fantastisk flott at folk tar seg ut i naturen. Men ein må vera bevisste på at det tar lenger tid og ein treng meir utstyr med seg enn mange har. I år er det Ulvanåso-massivet me har hatt desidert flest redningsaksjonar. Også i Englafjell og Bjørndalstraversen har det vore redningsaksjonar, oppsummerer Børve.
Han meiner dette er eit resultat av at biletet på friluftsliv har endra seg.
Artikkelen held fram under annonsen.
– No er det bilete på sosiale media som krevst. Me ser at Bondhusvatnet til dømes ein plass på topplista i landet, og alle «må» ha det på profilen sin. Slik er det med andre plassar også. Resultatet vert at for mange utfordrar den fysiske kapasiteten sin. Det er absolutt bra at folk blir i betre fysisk form. Men det må skje innanfor visse rammer. Ferdigheiter, utstyr og kor du går må stå i stil, gjentek har.
Han presiserer at gruppa som vart ståande fast i Ulvanåso fredag hadde utstyret, men at dei ikkje var kledde for dette, og bomma på tid og vanskegrad.
– Ved dei fleste aksjonane på Trolltunga er klede og fysisk form som er årsak til at folk treng hjelp. Vel rett stad og tid, og ta omsyn til forholda, sluttar Børve.