Om lag 30 personar i sving: – Skal vera førebudde
Alle tre naudetatane var med under øving denne veka.
Politi, brann og helse var alle til stades ved Malmanger skule både måndag og tysdag kveld denne veka. Målet var å øva på den såkalla PLIVO-prosedyren (Pågåande livstrugande vald), som ifølgje Helsedirektoratet si nettside var eitt av fleire oppfølgingstiltak som blei iverksett etter hendinga som råka Norge 22. juli i 2011.
– Dette er situasjonar der det blir utøva livstrugande vald mot fleire personar. Det er nasjonal prosedyre for korleis instansane skal samhandla ved ei slik hending, og vi har denne veka mellom anna øvd på korleis vi skal opptre, samverka og kommunisera på tvers av disiplinar, forklarar Torgeir Fosse ved Kvinnherad politistasjon.
Annonse
Heilt naudsynt
Han legg til at det var om lag 25 til 30 personar i sving begge kveldane øvinga pågjekk.
– Konkret gjekk øvinga ut på å handtera ulike iscenesette PLIVO-scenario. Vi håpar jo at dette er noko vi aldri vil få bruk for i verkelegheita, men det er viktig og heilt naudsynt å øva på det, slik at vi saman kan gjera ein god jobb. Dessutan er det eit nasjonalt krav at vi skal vera førebudde dersom ein slik situasjon skulle oppstå, sluttar Fosse.
