Om kjøpet av Stripo-eigedomen: – Ingenting kan stogga oss no

Dei to bedriftene kjende kvarandre godt frå før, og då begge leita etter nye lokale når Husnes Motor-eigedomen dukka opp for sal vart dei to partane fort einige.

Det var Kvinnheringen som omtala saka fyrst.

Ukjende planar

– Me har tidlegare diskutert ulike mogelegheiter, så når dette kom opp så fann me ut at det var ein plass me kunne dela. I utgangspunktet blir det ikkje noko meir samarbeid enn at me kjøper i lag, så skal me seksjonera eigedomen i to slik at me får éin kvar, sa dagleg leiar for Dekkservice Vest Johannes Hjønnevåg.

Hjønnevåg fortel vidare at dei trengte meir plass.

– Me trengte noko eige, og meir plass enn det me har her på Bogsnes. Me vaks oss kjapt ut av dette lokalet. Det er ganske plasskrevjande det me driv med, og me tel på knappane kva me skal til med der oppe, fortalde han.

I fylgje Hjønnevåg skal dei fortsetja med dekkhotell, samt at dei har godkjenning til å driva dekkverkstad i tillegg til at dei nyleg også har starta med antirustbehandling.

– Me tek det litt steg for steg, men me har ein del planar som ikkje vil ut med endå. Me overtek jo både bygget, dekkhotellet og dekkhotellkundane deira (Husnes Motor, journ.merk.), og berre der aukar me omsetjinga ganske kraftig. No får me også betre plass til å driva med annlegg- og lastebildekk, men det kjem altså meir etter kvart, understreka Hjønnevåg med eit lurt smil.

Overtakinga skjer 1. mai, men noko flytting vil nok ikkje skje før godt uti juni.

– Det vil framleis vera ganske travelt med dekk i mai, så eg vil tippa at me ikkje flytta før uti juni, forklarer han.

Plass å veksa

Dagleg leiar i Hagemeister Reset Bygg Gytis Marcisauskas gler seg til å koma på plass og meiner den nye lokaliteten blir vinn-vinn for begge to.

– Slik som me jobbar, eg innan byggebransjen og han med dekk og heilt andre ting, så blir det jo ikkje noko konkurranse mellom oss. Det blir litt sånn vinn-vinn for begge to, så dette blir spanande, sa Marcisauskas.

– Han får mest av bygget fordi han har mest behov for det, og me har mest behov for mykje plass på grunn av store anleggsmaskiner og mykje materiell og utstyr. Så dette er midt i blinken og passar oss begge veldig bra, fortsette han.

Planen er å byta fasade på det noverande bygget i tillegg til å bygga eit tilbygg på framsida.

– Akkurat no jobbar me med all dokumentasjonen og alle papira som må på plass for å få alt i orden. Men det er i alle fall planen, og målet vårt er å vera ferdig innflytta innan 1. september, forklarte Marcisauskas.

– No når me har sikra oss vår eigen plass så er det ein mykje betre stad å driva firmaet framover på. Det å sleppa og tenka på kva me skal gjera til neste år er godt. No har me vårt lager, kontor og vår plass å veksa vidare på, ingenting kan stogga oss no, avslutta han spøkefullt.