Om båtar, roing og Sognefjorden med Sigri Sandberg

Boka Ro: Om Sognefjorden og ein lang rotur heim (2022) er utgangspunktet for samtalen, som biblioteksjef Trude Hege Bergesen vil styra leia for.

I ei presseomtale kan ein lesa følgjande om bakteppet for Sandberg si siste bok:

«Sigri Sandberg rodde Sognefjorden sommaren 2021. Turen resulterte i boka Ro: Om Sognefjorden og ein lang rotur heim. Mannen, venninner og mor hennar er med på ulike strekk. Ferda startar ytst i havet, i Gulen der ho budde som lita, og går innover mot Luster og garden der ho delvis bur no. Undervegs fortel ho om korleis fjorden vart til, om vind og straumar og livet over og under vatn. Det vert bølgjer og dramatikk, men også blikstilt hav.»

I ei uroleg verd lengtar forfattaren etter ro og å finne heim, og i samtalen med biblioteksjefen vil ein få høyre om Sandberg fann det ho var på jakt etter.

Sigri Sandberg (f. 1975) vaks opp i Eivindvik, ytst i Sognefjorden og i Bergen. Ho har lang erfaring som journalist og er forfattar av fleire bøker. Ho skriv ofte om menneske i naturen, og har, ifølgje nettsida hennar, ei sterk dragning mot natur, nord og vest.