Ølve Industrier med stor og viktig kontrakt

Utstyrsleverandøren frå Ølve har rundt 90 prosent av verksemda retta direkte eller indirekte mot havbruk. Den største delen er innan lakseforedling.

Ølve Industrier AS melder dei nyleg er valt som leverandør til Nova Sea AS sitt nye lakseslakteri, som skal byggjast på den vesle øya Lovund ytst på Helgelandskysten, der Nova Sea starta si verksemd for litt over 50 år sida.

– Stor kontrakt

Bygget vil bli kopla til det eksisterande administrasjonsbygget til Nova Sea. Slakteriet blir på 17.200 kvadratmeter, og skal etter planen ha oppstart i tredje kvartal i 2026.

– Dette er ei stor kontrakt for Ølve Industrier AS, der me skal levera på to av kjerneområda våre, ishandtering og emballasjehandtering. Ølve har vore leverandør til Nova Sea i mange år, og ser fram til å fortsetje dette samarbeidet i mange år til, seier dagleg leiar Steinar Bjørkelund til Kyst.no.

Selskapet spesialiserer seg på utstyr i rustfritt stål, og leverer logistikkløysingar til blant anna transport av isoporkassar, is og fisk.

– Det fyrste utstyret til Nova Sea vil bli levert i midten av 2025, og deretter fram mot oppstart i midten av 2026.

Bjørkelund fortel til Kyst.no at bedrifta prosjekterer, byggjer, testar og installerer all elektro og automasjon ved fabrikken i Ølve. Dei har i dag ca. 2800 rutemeter med moderne produksjon og lagerlokale.

– Bra start på året

Til Nova Sea AS skal dei levera blant anna eit automatisert anlegg der kasser og lokk er urørte av menneskehender, samt transport og distribusjon av EPS-emballasje utan tape.

Selskapet omsette for om lag 76 millionar kroner i 2023, som er over 25 prosent opp frå 60 millionar kroner i 2022. Bjørkelund fortel det har vore ein hektisk, men bra start på året.

– Me har vore i sluttspurten på fleire store prosjekt. Me har blant anna levert emballasjehandtering til Bewi EPS sin kassefabrikk på Hitra, emballasjehandtering til Mowi sitt nye slakteri på Hitra, og dessutan emballasjehandtering og ishandtering til Holmøy Maritim sit slakteri som ligg utanfor Sortland, seier han.

No er dei i gang med å levera emballasjehandtering til Vikenco AS sitt slakteri på Aukra og Seashore sitt slakteri på Bømlo.

- For Ølve Industrier AS er denne nye kontrakten med på å sikre kontinuitet for bedrifta, i tillegg til arbeidsplassar i bygda Ølve framover, påpeiker Bjørkelund.

Per dags dato er det 35 tilsette i bedrifta, og automasjonsavdelinga har i dag ca. seks årsverk beståande av automatiskarar og automasjonsingeniørar. Bedrifta samarbeider med og har praksisplassar for elevar som går på Fusa vidaregåande skule.