Olivia og Lucas toppar namnelista

På jentesida var det Olivia som stakk av med sigeren, etter å ha blitt nummer tre i 2022. Olivia har blitt stadig meir populært heilt sidan årtusenskiftet, og har lege på topp 10 sidan 2015. I fjor vart 366 jenter gjeve namnet Olivia. Det var seks fleire enn Emma på 2. plass. Men i Vestland fylke var det Emma som vann. 56 barn her i fylket fekk dette namnet i fjor.

SSB opplyser at ein fellesnemnar for dei ti mest populære jentenamna er at alle endar på bokstaven A, bortsett frå Sofie.

– Dette er ein trend vi har sett over mange år at namn med vokalar og lite konsonantar aukar i popularitet. Spesielt dette med A-endingane er ein tydeleg trend. I år ser vi endå tydelegare at toppnamna for jenter nesten utelukkande endar på bokstaven A, seier Anders Sønstebø, seniorrådgjevar i seksjon for befolkningsstatistikk, i ein artikkel på SSB si heimeside.

Nykomarane på jentelista samanlikna med året før, er Maja, Alma og Ada.

«Blant desse er det kun Alma som har sin historiske debut på topp 10-lista i 2023. Alma var ganske vanleg på byrjinga av 1900-talet og har igjen auka i popularitet», skriv SSB.

Det kan elles nemnast at dersom Sofie og Sofia hadde blitt slege saman på namnelista, så hadde dei vunne med god margin. For det var over 600 barn som fekk eit av desse namna i fjor.

Topp 10 jenter:

1. Olivia

2. Emma

3. Ella

4. Leah

5. Sofie

6. Nora

7. Sofia

8. Maja

9. Alma

10. Ada

Bibelsk

Blant gutane toppar Lucas. Dette bibelske namnet har lege på Topp 10-lista i heile 17 år, og vart nummer tre i 2022. Lucas var vanlegast også i Vestland fylke, der 61 gutar vart døypt dette.

«Kasper og Elias er nykomarane på topplista over gutenamn. Medan Elias har vore inn og ut av topplista sidan 2006, har Kasper for fyrste gong i namnestatistikken si historie klatra opp på lista over de ti mest populære gutenamna», skriv SSB.

Topp 10 gutar:

1. Lucas*

2. Noah*

3. Isak

3. Oliver*

5. Kasper*

6. Elias

6. Emil

8. Jakob*

9. Oskar*

10. Theodor

* Gjeld alle skrivemåtar. Kjelde: SSB.