Olabilklubben legg ned – gir klubbkassa til BUA

Koronapandemien har vore utfordrande for Kvinnherad Olabilklubb som no har bestemt seg for å leggja ned. Noko som kjem BUA Kvinnherad til gode.

Klubben som starta som Team Kvålity tilbake i 2015, og som seinare har vore kjent som Kvinnherad Olabilklubb, har gjort seg godt merka i fleire løp rundt om i landet i si levetid. Men som så mange andre frivillige lag har åra med koronapandemi tæra på kreftene, og no har olabilkreftene bestemt seg for å leggja ned klubben.

– Det heile har lege litt brakk sidan mars 2020, og det er mykje som har skjedd på den tida. Barna har blitt eldre og interessa mindre, seier styreleiar Rune Enæs før primus motor Eirik Kvåle skyt inn:

– Planen vår var å koma oss på løp igjen då landet opna opp igjen sommaren 2021, men så vart alt avlyst igjen og interessa forsvann. Vi hadde ein tanke om å la klubben berre henga i lause lufta, men fann ut at det var like greitt å leggja ned. Det er kjedeleg å bestemma seg for å gje slepp på det.

Gir frå seg klubbkassa

Men ingenting er så gale at det ikkje er godt for noko. For sjølv om pandemien har bremsa opp olabilsatsinga i Kvinnherad, kjem det no andre barn og unge i Kvinnherad til gode.

– Det er jo sånn at vi har gjort oss merka rundt om på løp og hausta ei rekkje premiar. I tillegg har vi fått inn grasrotmidlar alle desse åra, og utgiftene har vore små. Så pengane har berre hopa seg opp, seier Kvåle og held fram:

– Eigentleg var det bestemt at om vi skulle finna på å leggja ned, så skulle pengane gå til ein anna olabilklubb. Men det er avgrensa av dei rundt om, så vi bestemte oss for at vi i alle fall ville gje klubbkassa vår til barn og unge, og vart einige om å gje den til BUA Kvinnherad.

40.688 kroner

Det sa Kvåle før han sprang ut av BUA-lokalet for å henta ein sjekk.

– Så her, Veronica, har du 40.688 kroner og 48 øre, smilte han og overrekte sjekken til ein like smilande leiar for BUA, Veronica T. Thorsen.

– Som leiar for frivilligsentralen er det trist at ein klubb legg ned. Covid har sett ein stoppar for mange og gjort det det vanskeleg. Men som leiar for BUA Kvinnherad så er det fantastisk å få midlar. Vi har mykje utstyr, men har òg veldig mykje som alltid er i bruk. BUA er veldig godt nytta, og særskild no i vinterferien. Vi har alltid ei lang ynskjeliste her, så pengane vil koma godt med. Det er difor ei lukka med denne gåva, seier Veronica.

Etter sjekkoverlevering og ein høgtideleg seanse inne i BUA-lokalet, kom Kvåle med ei oppmoding til dei vel 30 grasrotgivarane til Kvinnherad Olabilklubb.

– Om de ikkje har gjort det endå, så er det no på tide å bytta frå oss til ein annan lokal klubb, seier han.