Økopris til Isrosa

Økoprisen Vestland er eit handslag og ein takk til personar, lag, organisasjonar eller verksemder som på ulike måtar har synt særleg engasjement eller innsats for å fremje økologisk landbruk, forbruk og utvikling. Prisvinnaren vert heidra med eit bilete av ein lokal kunstnar og 15.000 kroner.

For 2023 er det vår lokale isprodusent Isrosa ved Øystein Skjæveland som vert heidra med prisen.

– Pionerarbeid

Når Økologisk Vestland oppsummerer Isrosa sitt løp til no, peikar dei på at Øystein Skjæveland starta med produksjon av økologisk is i 1999, medan han framleis var elev ved Sogn jord- og hagebruksskule.

– Heilt frå starten av la han ned eit imponerande pionerarbeid gjennom å utvikla ei heilt ny økologisk varegruppe her i landet, og finna nye bruksområde for lokalt produserte, økologiske råvarer. Nokre ingrediensar som egg og rabarbra er bedrifta sjølvforsynt med frå eige gardsbruk, andre varegrupper som mjølk, bær og frukt blir henta frå bønder i området medan det som ikkje er råd å produsera her i landet blir importert, skriv dei i presentasjonen av Skjæveland.

Førebilete

Økologisk Vestland meiner Isrosa heile vegen har lagt stor vekt på å finne lokale råvarer, og har slik klart å skape produkt med særpreg og høg kvalitet.

– Øystein har også heile vegen drive eit utrøytteleg formidlingsarbeid gjennom sitt virke på marknader og festivalar i store delar av Sør-Noreg. Både mjølkeis og fruktis frå Isrosa har blitt folkekjære produkt som ganske sikkert har nådd ut til mange forbrukarar også utover det tradisjonelle økosegmentet. Slik har Øystein bidratt til folkeopplysing og spreiing av den økologiske bodskapen på framifrå vis, skryt prisutdelaren.

– Etter snart 25 år i bransjen som ein pioner og eit førebilete for nye økoprodusentar fortener Isrosa anerkjenning for det store arbeidet som har blitt lagt ned, understrekar Økologisk Vestland.

Me stiller oss i rekkja og gratulerer med Økoprisen Vestland 2023!