Også SV/MDG med eige budsjettforslag: Vil auka grunnbemanninga
SV og MDG har funne saman om eit felles budsjettforslag. Dei vil mellom anna auka grunnbemanninga i barnehagane og starta forprosjekt for både Valen skule og ny symjehall på Husnes.
Publisert
På tysdag la Framstegspartiet fram sitt eige budsjettforslag. No opplyser Silje Nordtveit Olsen at hennar parti SV og MDG også har eit framlegg. Dermed blir det ein heilt annan budsjettdebatt i Kommunestyret torsdag enn det som var tilfellet i fjor.
– Det kom fram ganske tidleg i denne budsjettprosessen at fleirtalet ynska å arbeida med budsjett innad i koalisjonen, dette til sterk kontrast frå 2023 då det var viktig at alle skulle med. Vi har difor vore i dialog med fleire av mindretalspartia for å sjå om det er høve til å stilla felles budsjett. Nokon stod vi langt unna, nokon var svært nære, men ville stilla eige budsjett og MDG var samd i våre prioriteringar. Difor er det SV og MDG som stiller budsjett saman, fortel Silje Nordtveit Olsen til Grenda.
Annonse
Tre barnehagar
I fjor beklaga ho til Utdanningsforbundet at partia ikkje kunne prioritera auka grunnbemanning i barnehagane, men lova å gjer dette i år.
– For SV og MDG er dette eit særleg viktig sak. I statsbudsjettet er det sett av 250 millionar til styrka grunnbemanning i barnehagane i kommunane. Vi føl dette opp med midlar øyremerka Undarheim, Myrane og Sunde barnehage i fyrste omgang, dette etter god dialog med Utdanningsforbundet. I åra som kjem legg vi inn årleg auke slik at alle dei kommunale barnehagane får ein auke i grunnbemanninga, opplyser SV-leiaren i Kvinnherad. Summen i 2025 er på 2,5 millionar kroner i deira budsjettforslag.
Bufellesskap
Annonse
SV og MDG gjer også som Frp og legg inn pengar til brannstrukturen. Duoen vil setja av 8 millionar kroner til føremålet i 2025. Særleg brannstasjonen i Uskedalen ynskjer dei ei snarleg avklaring for.
– Vidare har vi prioritert forprosjekt på Valen skule, som skal avklara eit behov for enten nybygg eller rehabilitering. Dette er heilt tråd med SV si haldning om at det skal vera gode oppvekstkår. Vi har også lagt inn forprosjekt på ny symjehall på Husnes i 2025 og avklaring av behovet for idrettshall i Rosendal i 2026. Vi finn ekstra midlar til bufellesskap på Husnes, og auka midlar til både demensteamet og til skulehelsetenesta, informerer Nordtveit Olsen.
– Vi meiner vårt budsjettforslag styrkar velferdstenestene, gjev sosial rettferd, har eit fokus på berekraft, kultur og fritid, og Kvinnherad kommune som god arbeidsgjevar, avsluttar ho.
