Offentleggjer trusselvurdering for Vest politidistrikt

– Med dette deler vi vårt situasjonsbilete. Hensikta er å setja andre i stand til å ta gode val, redusera kriminalitet og bidra til auka tryggleik i befolkninga, seier politimeister Kaare Songstad, i ei pressemelding.

Han understrekar at Vest politidistrikt for dei aller fleste er ein trygg stad å bu. Det offentlege rom er prega av ro og orden, og dei færraste vert utsett for alvorleg kriminalitet.

– Samstundes må vi ikkje vere naive. Vi veit at kriminaliteten kan ha store konsekvensar for dei som vert råka, seier Songstad.

Betre samhandling

Rapporten startar med å skildra trekk i samfunnsutviklinga som bidrar negativt på kriminalitetsutviklinga. Deretter tek den for seg fem overordna kriminalitetskategoriar. Desse er framheva fordi det er registrert ein auke i omfang eller fordi konsekvensane for enkeltindivid eller samfunn vert vurdert som særleg alvorlege.

– Politiet kan ikkje førebyggja kriminalitet åleine. Vi trur at deling vil bidra til ei felles situasjonsforståing lokalt i distriktet. Dette vil igjen danna grunnlaget for endå betre samhandling med kommunar og andre offentlege aktørar, næringsliv, frivillige og innbyggarar for å førebyggja kriminalitet i Vest politidistrikt, analyserer Songstad.

Uroar spesielt

Politimeisteren håpar folk vil oppleva rapporten som nyttig.

– For oss har det vore viktig å ikkje berre beskriva truslane, men også koma med råd og gi eksempel på korleis denne typen saker kan sjå ut, fortel Kaare Songstad.

I forordet til rapporten peikar politimeisteren på eitt område som uroar han spesielt; kombinasjonen av auka ungdomskriminalitet med auka aktivitet hos kriminelle nettverk i Norge og på Vestlandet.

– Vi har eksempel på at ungdom i vårt politidistrikt blir brukt aktivt i alvorleg, organisert kriminalitet, opplyser Songstad.

Takkar for tips

I føreordet til rapporten skriv politimeisteren at det særskilt er tre område Vest politidistrikt skal jobba for å styrka framover; arbeidet mot kriminelle nettverk, ungdomskriminalitet og arbeidet mot vald og overgrep. I tillegg vil politiet satsa ekstra på arbeidet med digitale bedrageri og cyberkriminalitet.

«Politiet er avhengig av eit nært samarbeid med andre for å kunne forstå og vurdera kva kriminalitetstruslar vi står ovanfor og kven av desse som bør gjevast særskilt merksemd. Eg ynskjer difor å takka alle som har gitt tips til politiet, eller som på anna vis har bidrege med analysar av kriminalitet og faglege innspel. Dette ynskjer vi meir av», skriv Songstad.